ټاکل شوېده د ټاکنو خپلواک کمېسیون ډېر ژر د ولسي جرګې او د ولسوالیو شوراګانو د ټاکنو د ترسره کېدا نېټه اعلان کړي. ولسي جرګې په همدې پار نن د ټاکنو خپلواک کمېسیون مسوولان ور استجواب کړي وو؛ خو هغوی د یو مکتوب په ورلېږلو سره ځوابویلو ته حاضر نهشول.
پر دې سربېره د ولسي جرګې ځېنې غړي په هېواد کې د ناامنۍ او د رڼو ټاکنو لهپاره د مناسبو شرایطو نهشتوالي له کبله د اندېښنې په څرګندولو سره وايي چې ولسمشریزې، د ولسي جرګې او د ولسوالیو شوراګانو ټاکنې دې یوځای وشي، ګنې بیا دې موقت حکومت جوړ شي.
د ولسي جرګې غړي نعمتالله غفاري او نعیم لالی حمیدزی وايي چې د ټاکنو د ډېر لګښت نه د مخنیوي لهپاره باید درېواړه ټاکنې هممهاله د روان لمریز کال په تلې میاشت کې ترسره شي.
د دوی په وینا، که په ولسمشریزو ټاکنو کې هر څوک بریالی شو؛ د ۱۳۹۸ کال په لومړۍ میاشت کې دې خپله دنده پيل کړي.
له بلېخوا د ولسي جرګې ځېنې نور غړي بیا په اوسنیو شرایطو کې د رڼو او داسې ټاکنو غوښتنه کوي چې ټولو هېوادوالو ته د منلو وړ وي.
د ولسي جرګې رییس عبدالروف ابراهیمي وايي چې روان کال په هېواد کې خونړی کال و او پهداسې شرایطو کې ممکنه نهده چې رڼې ټاکنې وشي.
ده پر ولسمشر، اجرایوي رییس او نړۍوالې ټولنې غږ وکړ چې د ټاکنو اوسنی کمېسیون د ټاکنو د ترسراوي هېڅ اراده نهلري.
د ولسي جرګې لومړی نایب همایون همایون او د جرګې غړی عبدالله محمدي د راتلونکیو ټاکنو په اړه اندېښنه څرګندوي او تور پورې کوي چې ولسمشرغني د ټاکنو خپلواک کمېسیون ته هدایت کړی چې د ولسي جرګې په راتلونکیو ټاکنو کې د ده، له خپلو کسانو پرته بل هېڅ وکیل بریالی نهشي. د دوی په خبره، دا د ټاکنو په کمېسیون کې ښکاره او غیرقانوني لاسوهنه ده.
د ټاکنو خپلواک کمېسیون کمېشنر معاذ دولتي سلام وطندار ته وايي چې په یوځايي ډول د ولسمشرۍ، ولسي جرګې او د ولسوالیو د شوراګانو ټاکنې به فني ستونزې راولاړې کړي. ده وویل چې دا طرحه مخکې هم له ټاکنو کمېسیون سره شریکه شوېوه؛ خو د بودیجې او نورو ستونزو له امله ونه منل شوه.
ښاغلي دولتي همدارنګه وویل چې ولسمشرۍ ماڼۍ ورته تر دامهاله د سلیقوي چلند پر اساس د وکیلانو د ټاکلو او بریالي کولو په اړه څه نهدي ویلي.
دا پهداسې حال کې ده چې پرون د ټاکنو خپلواک کمېسیون رییس ګلاجان عبدالبدیع صیاد وویل چې د ولسمشریزو او د ولسوالیو د شوراګانو ټاکنو د ترسراوي دقیقه نېټه به نن اعلان کړي.
