ولسي جرګې په نننۍ غونډه کې د اسیا زړه کنفرانس لاسته راوړنې د پام وړ وبللې او په دې غونډه کې یې د ولسمشر محمد اشرف غني د دریځ ستاینه وکړه.
د ولسي جرګې ځېنو غړو په ټینګار سره د افغان ولسمشر غني د خبرو ملاتړ وکړ او زیاته یې کړه، چې "د سولې په برخه کې پرته له دې چې ولسمشر غني راپيل کړې؛ بله چاره نشته."
د ولسي جرګې غړو، د اسیا زړه په کنفرانس کې د افغان ولسمشر خبرو ته په اشارې سره پر هغه د باور موضوع تر هر څه اړینه وګڼله.
ولسمشرمحمد اشرف غني ویلي، تر راتلونکو څو اوونیو پورې به د سولې خبرې اترې پیل شي او پاکستان ژمنه کړې، چې په دغه بهیر کې به همکاري کوي.
ولسمشر غني تېره ورځ خبریالانو ته د اسیا زړه هېوادونو یا استانبول پروسې د وروستۍ غونډې د نتایجو په اړه د معلوماتو پرمهال وویل، د حکومت هدف دا دی، چې راتلونکی کال د تېرکال تکرار نه وي.
ولسمشر محمد اشرف غني د سولې د مذاکراتو پایلې ته محتاطانه امېدواري وښوده او ویې ویل، چې دا بهیر به د افغانستان د اساسي قانون په چوکاټ کې پر مخ ولاړ شي.
بل لور ته د ولسي جرګې لومړي نایب حاجي ظاهر قدیر له ولسمشر غني او افغان لوړپوړو چارواکو نه يې غوښتنه وکړه، که له هر هېواد سره د سولې او امنیت په اړه خبرې کيږي؛ نو ملي شورا هم باید په جريان کې وي.
دوی وویل، دا هېواد د برخلیک په اړه کېدونکې خبرې باید له ملي شورا نه پټې نه وي.
د ولسي جرګې ډېرو غړو د پاکستان له خوا د ترهګرو د ملاتړ نه د لاس اخیستلو موضوع، د دغه هېواد له خوا د سولې له پاره د غاړې اېښودلو په برخه کې لومړی قدم وګڼلو.
دوی زیاته کړه، چې د پاکستان د لومړي وزیر نواز شریف هغه ژمنه چې وروسته له دې به د ترهګرو ملاتړ نه کوي؛ دا مانا ورکوي، چې پخوا یې ورنه ملاتړ کولو.
د هغو پر خبره که نواز شریف خپلې دغې ژمنې ته عملي جامه واغوندي، نو د افغانستان په ګډون به په ټوله سيمه کې سوله او ثبات راشي.
دا په داسې حال کې ده، چې تېره ورځ ولسمشر غني د يوې خبري غونډې پر مهال وویل، چې د دولتونو تر منځ مناسبات د باور پر بنسټ نه، بلکې د ګټو له مخې تعریفیږي او د سولې خبرو اترو په برخه به له دې وروسته افغان حکومت د زیاتو ټيټو او جیګو شاهد وي.
