ولسمشر محمد اشرف غني او د هغه دویم مرستیال سرور دانش د بامیان په شیبر ولسوالۍ کې د بامیان ـ دوشي سړک لومړۍ برخې کار پیل کړ.
ښاغلي ولسمشر د دې مراسمو د پرانېستې پرمهال وویل، دغه لار مرکزي افغانستان له شمالختیځې او مرکزياسیا سره نښلوي.
په ورته وخت کې د ټولګټو وزیر یمایاري وايي، د بامیانو ـ دوشي سړک په ۶ برخو وېشل کېږي چې پر لومړۍ برخې باندې یې ـ چې ۲۵ کیلومتره سړک کېږي ـ ۲۷ میلیونه ډالره لګښت راځي.
د ده په وینا، د دې لویې لارې نورې برخې د تداراکاتو لاندې دي.
د ټولګټو وزیر همدارنګه وايي، دا مهال د سړکجوړولو ۲۸ پروژې تر کار او تدارکاتو لاندې دي.
ښاغلي یاري همداراز وویل، اوسمهال د سړکجوړولو ۲۸ پروژې تر کار او تدارکاتي پروسې لاندې دي چې نږدې ۲۰ میلیارده افغانۍ لګښت پرې راځي.
د ده په وینا، په بامیانو او مرکزي ولایتونو کې د سړکجوړولو او ساختماني ۸ پروژې تر کار لاندې دي او ځېنې پروژې د سړک د څارنې لهپاره ځانګړې شوېدي.
د بامیان ـ دوشي سړک د بامیانو له شیبر ولسوالۍ نه د ۱۵۰ کیلومترو په اوږدوالي سره، دغه ولایت د بغلان له لارې د هېواد له شمالي ولایتونو سره نښلوي.
په ورته وخت کې ولسمشر غني بامیانو کې د ۸۰ میلیونو امریکايي ډالرو په ارزښت د برېښنا رسولو ۳ سترې پروژې پرانېستې.
ولسمشر محمد اشرف غني پرون (جمعه) دایکنډي ولایت ته له یو ورځني سفر وروسته، د لوړ پوړي پلاوي په مشرۍ بامیانو ولایت ته لاړ.
ولسمشر بامیانو ته له رسېدو سره سم دشتاژدر سیمې ته لاړ او هلته یې د برېښنا رسولو د ۳ مهمو پروژو د بنسټ ډبرې کېښودې چې په دغو پروژو کې د ۲۰/۲۲۰ کیلوولټ سبسټیشن، له دوشي څخه تر بامیانو د ۲۲۰ کیلو ولټ لېږد مزي د تمدید او ۲۰ زره کورونو ته د برېښنا د وېش شبکه شامله ده.
یادې پروژې د افغانستان برېښنا شرکت اړوندې دي چې کابو ۸۰ میلیونه ډالر لګښت پرې راځي او قراردادونه یې مخکې د ولسمشر غني په حضور کې له درېیوو کمپنیو سره په ولسمشرۍ ماڼۍ کې لاسلیک شويدي.
د درېیوو واړو پروژو مالي لګښت د اسیا پراختیایي بانک له لورې ورکول کېږي چې د دوو کلونو په موده کې به ګټې اخېستلو ته وسپارل شي.
په ورته وخت کې د برېښنا شرکت مشر امان غالب وايي، په دغو دریو پروژو شاوخوا ۸۰ میلیون ډالره لګښت راځي.
ښاغلي غني د دې پروژو د پرانېستې پرمهال وویل چې دا برېښنا به یوازې کورنه روښانه نه کړي بلکې د دې ولایت د کانونو، زراعت، ټرانسپورټ او صعنت په برخه کې به کافي مرسته وکړای شي.
ولسمشر زیاته کړه چې د دایکندي له درېیمې درجې نه دویمه درجه ولایت ته ارتقاع د دې په معنا دا چې په مرکزي منطقو کې طبیعي زندانونه په ماتېدو دي او موږ به په راتلونکي کې په دایکندي او بامیانو کې د ژور تحول لیدونکي شو.
پر دې سربېره، د بامیان یو شمېر اوسېدونکیو او د روښنايي جنبش غړیو دې ولایت ته د ولسمشر غني سفر او د درېیوو پروژو پرانیستلو پر وړاندې غبرګون ښودلی او د بامیان له لارې یې د ۵۰۰ کیلوولټه برېښنا لېږدولو او د مرکزي سیمو امنیت تامینولو غوښتنه کړې.
چارواکي وايي، د بامیانو ـ دوشي لویه لار د سالنګ تونل بدیل دی او د ۲۲۰ کیلو ولټه برېښنا مزی هم، د ۵۰۰ کیلوولټه برېښنا بدیل دی چې ټکل شوې وه د بامیانو له لارې د هېواد سویلي او ختیځو ولایتونو ته ولېږدول شي.
