ولسمشر غني د اختر په دویمه ورځ ناوخته په یوه وېډویې پیغام کې د اوربند په ښه پلي کیدا خوښي څرګنده کړه او ویې ویل چې اوربند له پراخ ولسي ملاتړ سره مخ شو.
محمد اشرف غني وویل: « د ولس قاطع غوښتنې ته د احترام په خاطر د کوچني اختر له څلورمې ورځې څخه د هېواد امنیتي او دفاعي ځواکونو ته د اوربند د تمدید هدایت ورکوم، د تمدید شوي اوربند جزیات به ډېر ژر ملت سره شریک شي.»
دغهراز ولسمشر زیاته کړه:«د افغانستان اسلامي جمهوري دولت، لویې څارنوالۍ اوربند ته د احترام په خاطر او د ښه نیت د څرګندولو په خاطر پرون ۴۶ تنه طالبان له زندانه ازاد کړل، د محبوسینو د ازادولو لړۍ به دوام وکړي، په دې شرط چې د سولې او اوربند په هکله د مقابل لوري څخه هم مثبت عکس العمل ولیدل شي.»
ښاغلي غني په ټینګار سره وايي، له وسلهوالو طالبانو هم غواړو چې هغوی هم خپل اوربند تمدید کړي. د اوربند په موده کې به د افغانستان د حکومت لهخوا د طالبانو ټپیانو ته طبي مرستې او د اړتیا په وخت کې بشري مرستې ورسېږي او د طالبانو بندیانو ته به له خپلو کورنیو سره د اسانه تماس او لیدلو زمینه هم برابره شي.
د هېوادونو او سازمانونو لهخوا د ولسمشر غني د اوربند غځولو اعلان ستاینه
تېره ورځ د امریکا بهرنیو چارو وزارت په خپرې شوې اعلامیه کې د افغان حکومت او طالبانو ترمنځ د اوربند اعلان او له عملي کېدو یې ستاینه او ملاتړ کړی دی.
د امریکا د بهرنیو چارو وزیر مایک پامپیو ویلي دي، په خوالو رسنیو کې د افغان سرتېرو، ولس او د طالبانو ګډه خپاره شوي انځورونه ښيي که دوی یو ځای لمونځ اداکولی شي او ګډه خوښي لمانځلی شي دغه راز د دواړو خواوو مشرانو دغه روان کړکېچ هم حلولی شي.
په ورته وخت کې د برېټانیا د بهرنیو چارو وزیر بوريس جانسن، د ناټو سرمنشي ينس سټولټنبرګ، د افغانستان لهپاره د ملګرو ملتونو د سرمنشي ځانګړي استازي تاداميچي ياماموتو، په افغانستان کې د ناټو تر مشرۍ لاندې د غوڅ ملاتړ ماموريت، اروپايي ټولنې، د افغانستان د سولې عالي شورا، په افغانستان کې د امریکا سفارت او یوناما په خپرو کړیو اعلامیو او په خپلو رسمي فیسبوکونو او ټویټونو کې د ولسمشر غني لهخوا د اوربند غځېدو اعلان تمدید هرکلی دی او له وسلهوالو طالبانو یې غوښتي دي چې دا فرصت باید له لاسه ورنهکړي.
په ورته وخت کې د ولسمشر غني له دې اعلان وروسته زیاترو هېوادونو د دې خبرې ملاتړ کړی دی او په خوالو رسنیو یې خپل مثبت غبرګون او تاثر ښودلی دی.
