ولسمشر محمداشرف غني د روژې میاشتې د رارسېدو په مناسبت پیغام کې یو ځل بیا له طالبانو غوښتي چې روژې ته په درناوي دې جګړه پرېږدي او د سولې لار دې غوره کړي.
ولسمشر ویلي، روژه د سولې او پخلاینې میاشت ده او طالبان هم باید دې میاشتې ته په درناوي سوله وکړي.
نوموړي په خپل پیغام کې ویلي:«زه یو ځل بیا له طالبانو غواړم چې دې مبارکې میاشتې ته په درناوي، د سولې او پخلاینې غوښتنې ته چې د مشورتي لویه جرګې په پرېکړو کې یې پراخ انعکاس پیدا کړ، لبیک ووايي.»
په همدې حال کې د سولې عالي شورا هم پر افغان دولت او طالبانو غږ کړی چې د روژې مياشتې له پيل سره سم دوامداره اوربند اعلان کړي.
د بشري حقونو کمېسیون او د افغان ښځو شبکه اوربند غواړي
هلمندي لاریونوال: د الفتح او خالد عملیاتو پر ځای اوربند غواړو
«افغان حکومت او طالبان دې اوربند وکړي»
د سولې عالي شورا په بیان کې لیکل شوي: «له شک پرته دغه اوربند د باور فضا د رامنځته کولو لپاره په بېلابېلو سطحو کې ښه منځګړى کېداى شي او د يوې تلپاتې او مستحکمې سولې لپاره چې د افغانستان ټول ملت يې تږى دى، لار پرانېزي.»
ولسمشر غني د تېرې جمعې په ورځ د سولې مشورتي لویې جرګې په وروستۍ غونډه کې وویل، که طالبان چمتو وي، افغان حکومت اوربند ته حاضر دی.
خو طالبانو بیا په روژې میاشت کې هم د خپلو بریدونو پر دوام ټینګار کړی دی.
دا په داسې حال کې ده چې ولسمشر محمداشرف غني تېر کال هم د روژې میاشتې په وروستیو کې له طالبانو سره ۱۴ ورځنی اوربند اعلان کړ، خو طالبانو بیا یوازې د کوچني اختر په لومړیو ۳ ورځو کې ورسره اوربند وکړ او د اوربند غځېدو ته حاضر نه شول.
