افغان ولسمشر محمد اشرف غني د افغانستان فوټبال ملي لوبډلې د لوبغاړو سره په لیدنه کې ویلي دي، چې په راتلونکي کال کې به د لوړو زده کړو، پوهنې او امنیتي وزارتونو د بېلې شوې بودیجې یوه برخه لوبو ته ځانګړې کړي.
له ارګ نه په خپرې شوې خبرپاڼې کې راغلي دي، چې ولسمشر غني د فوټبال فدراسیون، د فوټبال ملي لوبډلې او روزونکي ډلې ته په اسیایي فوټبال جام ټاکنیزپړاو سیالیو کې د ښوو لوبو او بریاو مبارکي ورکړه.
په دې کتنه کې ولسمشر غني ژمنه وکړه، چې د ټولو لوبو او په ځانګړي ډول د فوټبال لوبې له پاره به د دې امکانات برابر کړي، چې د هېواد ګوډ، ګوډ ته ورسیږي.
غني هیله وښوده، چې د هېواد په ښوونځیو او پوهتونونو کې به د لوبو له پاره اړین امکانات برابر شي او په څنګ کې یې باید په هره قول اردو او لوا کې د لوبو له پاره بنسټیز کارونه وشي.
ولسمشر له ملي لوبډلې سره په لیدنه کې د ورزش له ملاتړو بنسټونو مننه وکړه او زیاته کې کړه، چې د هېواد د ورزش د مالي ملاتړ او لا زیاتو ورزشي اسانتیاو د برابرولو له پاره به له دولتي او نړیوالو سرچینو استفاده وکړي.
افغان ولسمشر غني د فوټبال فدراسیون او ملي لوبډلې ترڅنګ د الماني روزونکي پیټرسرګیټ له هڅو هم مننه وکړه.
ولسمشر وویل، د تاسې هره بریا له افغانانو غم او اندېښنې هېروي، «تاسې یۍ! چې په خولو مسکا راولۍ او ستاسې د بریا له پاره د هېواد هر وګړی لاس په دعا دي».
غني وویل، په داسې یو هېواد کې چې د اعتیاد، وزګارتیا او افراطي نظریاتو میراث یې اخیستی وي، تاسو د دې هېواد د ځوانانو له پاره یو ښه بېلګه یې.
افغانستان فوټبال ملي لوبډلې په خپلو وروستیو نړیوالو سیالیو کې ښې لوبې وکړې، چې سنګاپور ته په ماتې ورکولو د اسیا سترو فوټبال جام سیالیو ته دلارې موندې په موخه په خپل تاریخ کې د لومړي ځل له پاره په دریم پړاو ټاکنیزو سیالیو کې دلوبېدو چانس هم ترلاسه کړ.
