ولسمشر اشرف غني د ملي امنيت په شورا کې د پکتيکا والي عبدالکريم متين د تورونو سپيناوي په موخه د دولتي او حکومتي مقاماتو څخه ګډ پلاوي و ټاکل.
ولسمشر په دغو پلاو کې، د کورنيو، عدليې او د راستنېدونکو او کډوالو چارو وزيران، د ولسي جرګې دويم مرستيال، د مشرانو جرګې دويم مرستيال، د ولسي جرګې د دفاعي کمېسيون او د دغې جرګې د داخلي او ملي امنيت مشران، د مشرانو جرګې د داخلي امنيت کمېسيون او د دغې جرګې د سیمه ییزو ارګانونو د دفاعي کميسيون مشران، د ملي امنيت عمومي مشر، په نظامي چارو کې د لوی څارنوال مرستيال او د سيمه ییزو ارګانونو ادارې سرپرست شامل دي.
د ولسمشرۍ ماڼۍ په خپله پاڼه کې لیکلي، جمهور رییس غني ټاکل شوي پلاي ته دنده سپارلې، چې د پکتيکا والي د تورونو په باب هر اړخيزې څېړنې وکړي او پايله يې ولس ته واوروي.
له دې وړاندې د پکتيکا والي عبدالکريم متين سلام وطندار ته ويلي و، چې د ډيورنډ کرښې هغې غاړې وسله وال د افغانستان نورو ولايتونو ته اوړي.
هغه دا هم ويلي و، چې دغه وسله وال په مرمۍ ضد موټرو سمبال دي او د افغانانو په ژبه نه پوهيږي.
د پکتيکا والي زياته کړې وه، چې ده څو څو وارې د افغانستان د ملي امنيت شورا ته په دې اړه راپور ورکړی و، خو دغه اداره يې په اړه څه نه دي ويلي.
دپکتیکا والي دا تور هم پورې کړی و چې دملي امنیت شورا هغه کورنيو ته مالي مرستې ورکوي چې ګټه یې داعش ته رسيږي. او دا مرستې یې داعش سره بللې وې.
همدارنګه دملي امنیت په دغه جلسه کې د ملي امنيت شورا د مرستيال سلاکار، پکتيکا د والي دغه تورونه په کلکه رد کړل.
د پکتيکا والي د افغانستان د ملي امنيت پر شورا دا تور هم پورې کړی و، چې د مخالفو وسله والو سره نقدي مرستي کوي.
