د بامیان او غزني ولايتونو څخه را رسېدلي راپورونه وايي، چې وسله والو طالبانو نن سهار د کابل ـ غزني او کابل ـ بامیانو د لویو لارو پر امنيتي پوستو بريدونه کړي.
د میدان وردګو سیمه ییز چارواکي وايي، چې د طالبانو دغه بريدونه يې په شا تمبولي او اوسمهال په سیمه کې د وسله والو پر ضد چاڼيز عمليات پېل شوي.
د ياد ولایت د والي ویاند عطاالله خوږياڼي سلام وطندار ته وویل، چې نن پنجشنبه (اکټوبر۱۵مه) سهار مهال سلګونو وسله والو د کابل ـ غزني او کابل ـ بامیانو لويو لارو پر امنيتي پوستو بريدونه کړي او د سپرليو ځينې موټرونه يې هم تالاشي کړي دي
د هغه په خبره وسله وال طالبان د افغان ځواکونو له ځوابي بريدونو سره مخ شوي او اوس هم نښته روانه ده.
خوږياڼي زياتوي، چې د نښتې په ترڅ کې وسله والو مخالفینو ته درنه مرګ ژوبله اوښتې او د کابل ـ غزني لویه لاره د ټرافیکو پرمخ پرانیستل شوه، خو د کابل ـ بامیانو لویه لاره لاهم د مسافرو د تګ راتګ پرمخ تړل شوې ده.
هغه وایي، اوسمهال په سیمه کې د وسله والو طالبانو پر وړاندې پوځي عملیات روان دي او ډير ژر به د کابل ـ بامیانو لویه لار هم پرانیستل شي.
د جلریز ولسوالۍ یوه اوسیدونکي حاجي شاپور سلام وطندار ته وویل، له نن سهار راهیسې د کابل ـ بامیانو لویه لاره وسله والو طالبانو د مسافرو او امنیتي ځواکونو د تګ راتګ پرمخ تړلې او په سیمه کې نښته روانه ده.
خو د میدان وردګو د ولایتي شورا یوه غړي شریف الله بیا وايي، چې د کابل ـ غزني او کابل ـ بامیانو پرلویو لارو له تېرو څو ورځو راهیسې وسله والو مخالفینو مسافرو ته د تګ راتګ پرمهال ډيرې ستونزې راپورته کړي.
هغه له دولت څخه غوښتنه وکړه، چې ددغو لویو لارو د امنیت خوندیتوب ته پوره پام وکړي.
یاده دې وي، چې په دې اړه تر اوسه د وسله والو طالبانو له لوري څه نه دي ویل شوي.
