وزیرلرنینگ استیضاح قیلیش سونگی کونیده، نمایندهلر کینگشی اقتصاد، ساغلیقنی سقلش و قاچقینلر وزیرلریگه صندوق قویدیلر. بومرته هم وزیرلر غیابتیده رأی بیردیلر.
اقتصاد وزیری عبدالستار مراد114 تأیید و 81 رد رأی، قاچقینلر وزیری سیدحسین عالمی بلخی 105 تأیید و 90 رد رأی و ساغلیقنی سقلش وزیری فیروزالدین فیروز 170 تأیید و 28 رد رأی آلیشلری بیلن قیتهدن نمایندهلر ایشانچینی آلدیلر.
استیضاح بولگن وزیرلر ارا مدنیت و اخبارات وزیری عبدالباری جهانی هم شامل ایدی، بیراق جناب جهانی نینگ وزیرلیکدن استعفا بیرگنلیکی دلیل اونگه صندوق قویمهدیلر.
اوتگن هفته جناب جهانی جمهور رییسگه استعفاسینی یوبارگن ایدی حاضرگه قدر اونی تأیید یا رد قیلینشی جمهور رییس تامانیدن معلوم قیلینمهگن. نمایندهلرنینگ ایتیشلریچه، مدنیت و اخبارات وزیری نینگ استعفاسی رد بولگن تقدیرده اونی هم استیضاح قیلیشلری ممکن.
شوهفته باشلهنیشیدن نمایندهلر کینگشی تشقی ایشلر، یوکسک تحصیلات، شهر وقریش، عدلیه، ایش و اجتماع، فواید عامه، سالیق/مالیه، ترانسپورت، معارف، سوو وبرق، ایکینچیلیک، مخدرمادهلرگه قرشی کورهش وزیرلیگی، مخابرات، اقتصاد، ساغلیقنی سقلش و قاچقینلر وزیرلرینی استیضاح قیلگن ایدی. بو استیضاح قیلینگن وزیرلردن 7 تهسی ایشدن آلیندی و 9 تهسی قیته ایشانچ آوازینی آلیب جایلریده قالدیلر.
وزیرلرنی استیضاح قیلیش دلیلی بودجهدن 70 فایزینی مصرف قیلمهگنلیکلری، قانونگه قرشی عمل قیلیش و آلدیندن تولنهدیگن پولنی تولمهگنلری سبب بولگن.
