چارواکي وايي، ډېر ژر به د ننګرهار ولایت چپرهار ولسوالۍ کې د دولتي ځواکونو په عملیاتو کې د وژل شویو کسانو هویت معلومولو په موخه له پلازمېنې کابله یو پلاوی سیمې ته ورشي.
د چپرهار ولسوالۍ دولتزیو سیمې په چینو کلي کې تېره شپه د ملي امنیت ۰۲ ځانګړې قطعې عملیات کړي چې ۹ کسان په کې وژل شوي او ۸ نور ټپیان دي.
د چپرهار دولتزي د مشرانو جرګې مشر فضلهادي مسلمیار پلرنۍ سیمه ده.
که څه هم ډېر ولسي خلک وژل شوي او ټپيان ملکي وګړي او د فضلهادي مسلمیار د کورنۍ غړي ګڼي؛ خو د چپرهار ولسوال غالب مجاهد او یو قومي مشر ملک محکم وايي، وژل شویو او ټپیانو کې د مسلمیار اړوند محلي پولیس هم شامل دي. د دوی په وینا، په ټپيانو کې له یوې کورنۍ د محلي پولیسو ۴ تنه او یوه ماشومه شامل دي.
حکومتي چارواکیو د دغو عملیاتو د اصلي موخې په اړه څه نهدي ویلي.
د ننګرهار د والي ویاند عطاالله خوګیاڼي رسنیو ته ویلي، په ټپيانو کې یوه مېرمن او یوه وړه ماشومه هم شته.
هاخوا د مشرانو جرګې د مشر فضلهادي مسلمیار د دفتر رییس ضیاالرحمان ضیا او د مسلمیار پلویانو په نوم یوې رسمي فیسبوکپاڼې لیکلي، چې وژل شویو کې د ښاغلي مسلمیار ترونه او د کورنۍ نور غړي شامل دي.
په ټولنیزو رسنیو کې ځېنې داسې معلومات هم لاس په لاس کېږي، چې تېره شپه د چپرهار په دولتزیو سیمه کې ۰۲ ځانګړې قطعې د داعشیانو پر ضد عملیات کول چې د مسلمیار اړوند ملي پولیسو یې مخه نیوله.
پهدې معلوماتو کې راغلي چې د امنیتي ځواکونو له خبرداري سره – سره بیا هم محلي پولیسو پر شا تګ ونهکړ؛ نو ځکه خو د ۰۲ قطعې سرتېرو پرې برید کړیدی.
ویل شوي، پهدې عملیاتو کې له دولتزیو سیمې د داعشیانو دوه مهم کسان هم نیول شويدي.
لهدې مخکې هم د ننګرهار په بېلابېلو سیمو کې د ملي امنیت ۰۲ ځانګړي ځواک عملیات کړي چې کله ناکله ترې د ملکيانو د مرګژوبلې خبرونه هم خپاره شويدي.
