د میدان وردګ ولایت امنیه قوماندان مل پاسوال محمد خلیل انداربي سلام وطندار ته وویل، د تېرو دوو ورځو راهیسې د میدان ورد ګو په بهسودو او دایمیرداد ولسوالیو کې د کوچیانو او ځایي اوسېدونکو ترمنځ د ځمکې پر سر یو ځل بیا شخړې تازه شوې دي.
انداربي وایي، یادو سیمو ته اضافي سرتېري او قومي مخور استول شوي، چې د دوی ترمنځ اوربند وکړي.
بل لورته د میدان وردګو د والی ویاند عطاءالله خوګیاڼي سلام وطندار ته وویل، په دغه نښته کې دواړو لورو ته مرګ ژوبله اوښتې ده.
خوګیاڼی وایي، چې د کوچیانو او هزاره ګانو ترمنځ د راپورته شوې شخړې په پایله کې یو کوچی او یو هزاره وژل شوي او یو کوچی او یو هزاره ټپيان شوي دي.
د میدان وردګو والي حیات الله حیات د یوې غونډې له لارې په ښکېلو غاړو غږ وکړ، چې له نښتې لاس په سر شي او مرکزي حکومت به روان کال دغه ستونزه اواره کړي.
ولسمشر غني د روان زېږديز کال د (می) په میاشت کې د حاجي دین محمد په مشرۍ د کوچیانو او ځایي خلکو ترمنځ د شخړو د حل لپاره کمېسیون جوړ کړی و.
افغان ولسمشر دغه کمېسیون ته د یو فرمان په ترڅ کې ویلي وو، چې دغه کمېسیون موظف دی، چې د ۳ میاشتو په موده کې د کوچیانو د ملکیت اسناد وڅېړي، په ټولو سیمو او ولایتونو کې د کوچیانو او ځایي خلکو ترمنځ د شخړې وړ املاک تثبیت او د کوچیانو د اسنادو د تایید او د هغوی د ملکیتونو د تثبیت په صورت کې دې؛ د کوچیانو د ځمکوالۍ لپاره د حل لاره وړاندې کړي.
ولسمشر محمد اشرف غني د دغه کمېسیون رییس او غړو ته لارښوونه کړې وه، چې د کوچیانو او ځایي خلکو ترمنځ د شخړې وړ اساسي ستونزې په دقیقه او هر اړخیزه توګه وڅېړي او د بنیادي حل لارې لپاره خپل ځانګړي وړاندیزونه ولسمشریزې ماڼۍ ته وړاندې کړي.
د یادونې ده، چې د کمېسیون د جوړېدو یوه میاشت پوره کېږي، خو تر اوسه یې کومه مثبته پایله نه لیدل کېږي.
په میدان وردګو ولایت کې د کوچیانو او هزاره ګانو ترمنځ د ځمکې او څړځایونو پر سر دغه شخړې شاوخوا ۱۲ کلنه مخینه لري، چې وخت ناوخت په کې د نښتو له امله دواړو خواوو ته درنه مرګ ژوبله هم اوښتې ده.
ځېنو کارپوهانو په باور، د کوچیانو او هزاره ګانو ترمنځ له راټوکېدونکو شخړو سیاسي استفاده کېږي او له همدې امله خلک له افغان دولت څخه غواړي، چې د دغو ۲ قومونو ترمنځ د شخړې او لانجو لپاره یو دایمي حل پیدا کړي.
په افغانستان کې د ځمکو پر سر د شخړو د رامنځته کېدو مسله څه نوې خبره نه ده، تر دې وړاندې په څو وارې په بیلا بیلو سیمو کې د ځمکو پر سر شخړې شوي دي، چې د پکتیا، ننګرهار، خوست، میدان وردګ او د لوګر ولایت په شمول ځېنو نورو سیمو کې هم دا ستونزه بې حله پاتې ده.
