بېړنیو پېښو ته د رسېدو په چارو کې د دولت وزارت چارواکي وايي، چې د سړې هوا او سختو واورو اورېدنو له امله د هېواد په ۱۹ ولایتونو کې ۴۰ تنه هېوادوال وژل شوي او ۴۳ نور ټپيان دي.
د دې وزارت د شمېرو له مخې وروستیو واورو د ځاني زیان سربېره ۹۲ کورونه په پوره ډول او ۳۰ نور کورونه یې په نامکمل ډول ویجاړ کړي دي.
د بدخشان ولایت له طبیعي پېښو سره د مبارزې رییس سیدعبدالله همایون دهقان سلام وطندار ته وویل، چې د دې ولایت په مایمي او یاوان ولسوالیو کې د واورې اورېدنې له امله ۱۸ تنه وژل شوي و ۱۲ نور ټپيان دي.
د ده پر خبره، د ۲۵ کورونو د ویجاړتیا تر څنګ له مرکز سره د ولسوالیو د ټګ را ټګ لارې هم تړل شوي دي.
د راپورونو له مخې د سخت واورین توپان له امله د بامیان، دایکندي او غزني ولایتونو لارې له ولسوالیو سره تړل شوي دي.
په ورته وخت په جوزجان کې هم د شاوخوا ۱۰۰ کلیو د تګ را تګ لارې تړل شوي دي.
د درزاب ولسوال رحمت الله حشر وايي، ۱۵ تنه مسافر د دې ولسوالۍ د کولیان سردره په سیمه کې د واورو له امله بند پاتې دي، چې د خلاصون په موخه یې هڅې پيل شوي دي.
دغه راز د سرپل ولایت له طبیعي پېښو سره د مبارزې رییس عزیزالله ایمان وايي، په دې ولایت کې د واورو اورېدنې له امله ۶ تنه وژل شوي او ۲۴ کورونه یې ویجاړ کړي دي.
د سالنګونو د ساتنې او خوندیتوب مسوول جنرال رجب وايي، تراوسه په سالنګ کې ۱۸ واورین کوچونه راغلي او د نور احتمال هم شته.
دی وايي، چې د احتمالي خطرونو د ختمېدو تر وخته به د مسافرو پر مخ د سالنګ لار تړل شوي وي.
تردې دمه سختو بارانونو او واورو اورېدنو د بدخشان، بامیان، دایکندي، غور، سرپل، کندهار، کونړ، ننګرها، کاپيسا، غزني، زابل، پنجشېر، پکتیا، پروان، بغلان، فاریاب، هرات، نورستان، او لغمان ولایتونو ځینې لارې د ترافیکو پر تړل شوي او خلکو ته مالي او ځاني زیانونه اوښتي دي.
