یو شمېر تقاعد شویو کسانو له څو میاشتو راهیسې خپل حقوق اخیستي نهدي.
دوی وايي، څو ځله یې د تقاعد ریاست، مالیې وزارت او اسلامي بانک ته د پیسو ترلاسه کولو په موخه مراجعه کړې، خو پیسې یې نهدي ورکړل شوې.
شریف چې د خپل پلار د تقاعدۍ پیسو پسې راغلی، سلاموطندار ته وویل، له زمري میاشتې راهیسې هڅه کوي چې د خپل پلار د تقاعدۍ پیسې واخلي، خو د تقاعد ریاست، بانک او مالیې وزارت تر منځ سرګردانه ګرځي.
د شریف په وینا، کله چې د تقاعد ریاست ته ورشي ورته وايي، پیسې یې د پلار حساب ته استول شوي، خو کله چې بانک ته ځي د بانک مسوولان ورته وايي، پیسې مو حساب ته نه دي راغلي او ستونزه په مالیې وزارت کې ده.
خو د مالیې وزارت ویاند شمروزخان مسجدي وايي، د دغه وزارت او د کار او ټولنیزو چارو وزارت ترمنځ د شوې هوکړې له مخې، تېر کال باید ټول تقاعد شوي کسان بایومټریک شوي وای، خو دغه تر اوسه دغه پروسه بشپړه شوې نهده. د نوموړي په وینا، له دې سره سره یې پیسې د کار او ټولنیزو چارو وزارت ته ورکړې دي.
مسجدي زیاتوي، په نوي مالي کال کې ټولو تقاعد شویو کسانو ته چې بایومټریک شوي، د تقاعدۍ پیسې ورکول کېږي.
موږ هڅه وکړه چې په دې اړه د کار او ټولنیزو چارو وزارت نظر هم واخلو، خو له پرلهپسې اړیکو سره سره و نه توانېدو.
