د عامې روغتیا وزارت وايي، تېرو ۲۴ ساعتونو کې د هېواد ۷ ولایتونو کې د کرونا ویروس ۵۰ تازه مثبتې پېښې ثبت شوي دي.
د عامې روغتیا وزیر فېروز الدین فېروز نن (پنجشنبه د ثور په ۴مه) وویل، د دغه وزارت لابراتوارونو کې د کرونا ویروس ۵۰ تازه پېښې ثبت شوي چې د هېواد ۳۲ ولایتونو کې د مثبتو پېښو شمېر ۱۲۲۶ ته رسېږي.
له دغو ۵۰ تازه پېښو ۲۱ هرات، ۱۵ کندوز، ۶ کابل، ۴ لوګر، د لومړي ځل لپاره ۲ پېښې پنجشېر او یوه یوه پېښه تخار او جوزجان ولایتونو کې ثبت شوې ده.
د عامې روغتيا وزير وویل، تېرو دوو شپو او ورځو کې هېواد کې د کرونا ویروس له کبله هېڅ مړینه نه ده ثبت شوې او د مړینې شمېره هماغه ۴۰ ده.
د عامې روغتیا وزارت د شمېرو له مخې، افغانستان کې کرونا ویروس څخه تراوسه ۱۷۷ کسان بیرته روغ شوي دي.
فېروز الدین فېروز هېواد کې په چټکۍ سره د کرونا ویروس له خپرېدو اندېښنه ښيي او له هېوادوالو غواړي چې د کرونا ویروس مخنیوي لپاره روغتیايي سپارښتنې جدي وګڼي.
دا مهال کابل د ۴۱۹ مثبتو پېښو په درلودو، په کرونا ویروس د ککړو ولایتونو لومړي سر کې دی.
له کابل وروسته، هرات د ۳۵۸ او کندهار د ۱۳۰ پېښو په درلودو یو پر بل پسې دویم او درېیم ځای کې دي.
ټوله نړۍ کې هم په کرونا ویروس د اخته کسانو شمېر له ۲ میلیون او ۶ سوه زرو نه اوښتی او له ۱۸۴ زرو زیات کسان یې مړه کړي دي.
