افغانستان جمهور رییسی، شهر قوریش وزیرلیگی بیلن کابل بانک سابق مدیره هیأتی و بو بانکنینگ اصلی قرضدارلریدن بیری خیلیلالله فیروزی اورتهسیده امضالنگن شرطنامهنی بیکار ایتدی.
جمهور رییسلیک سرایی تامانیدن نشر ایتیلگن خبرنامهده یازیلیشیچه، اوشبو کیلیشو حکومت کابل بانک قرضدارلریدن پولنی آلیش اوچون بیرگن وعدهسی، مذکور مبلغ قانونی یول بیلن تولَنیلیشی، حقوقی بُعدی بولمهگنی و حقوقی مسالهلری ضعیف بولگنی اوچون بیکار قیلینگن.
شونینگدیک خبرنامهده، خلیلالله فیروزی بارهسیده عالی محکمهنینگ صادر قیلگن فرمانی اوزگرمسلیگی یازیلگن.
شونینگدیک جمهور رییسگه کوره، هوشمند شهرچهسی قوریلیشی اوچون جناب فیروزی تامانیدن اختصاصلشتیریلگن ییر قانونگه موافق دولت ملکیتگه اوتیشی تاکیدلنگن. غنی مملکت دولت باشقرهلاوچیلیگیدن تیزلیکده کابل بانک قضیهسی عامللری بارهسیده معلومات بیریشنی سورگن.
عین حالده، جمهور رییسنینگ حقوقی مصلحتچیسی عبدالعلی محمدی بوندن تورت کون آلدین کابل بانک پوللرینی ییغیش کمیسیون، جمهور رییسلیک سرایی، کابینه و کابل بانک دوسیهسی تیکشیریلیشی اوچون ایجاد ایتیلگن مخصوص محکمه کابل بانک قرضدارلری آزادلیککه چیقاریلیشی بیلن قرض دولتگه تولنیشی اوچون قرار آلگن دیگن ایدی.
جناب محمدی، حکومتنینگ نیتی اوشبو قرضدارلرنی آزادلیکدن محروم ایتیش ایمس، بلکه اهالی پولینی قولگه کیریتش دیگن ایدی. محمدی، اوشبو شخصلر مملکتدن قاچگن یا- ده تورمهده سقلنگن حالده، قرضلرینی تولش قیین بولهدی دیگن ایدی. شونینگدیک جمهور رییسنینگ حقوقی مصلحتچیسی کابل بانک پوللرینی قولگه کیریتیش اوچون اینگ یخشی یول بولگن لیگینی تیلگه آلگن ایدی.
هوشمند شهرچهسی کابل خلق ارا هوا میدانی و آریا شهرچهسی یقینیده جایلشگن. مذکور شهرچه 68جریب ییرده 40 بلاک ده تورت ییلده قوریلیشی نظرده توتیلگن.
هوشمند شهرچهسی مسووللریگه کوره، 600 دن 900 میلیون دالر مذکور شهرچه قوریلیشی اوچون سرمایه یاتقیزیلهدی. ایتیلیشیچه، مذکور شهرچهده ایکی مینگ کیشی ایش جایی بیلن تامین لنهدی.
مملکت شهر قوریش وزیری سیدسعادت منصور نادریگه کوره، هوشمند شهرچهسی مذکور وزیرلیک نظارتی آستیده قوریلهدی. حکومت اوشبو شهرچهدن 75 میلون دالر قولگه کیریتهدی. اونگه کوره، 13 ییل جریانیده بو بیرینچی شهرچه افغانستان حکومتی ییریک درآمد قولگه کیریتهدی.
ایتیلیشیچه، مذکور شهرچه 40 بلاک و 4800 آپارتماندن عبارت بولیب، شهر قوریش وزیرلیگی معیاری اساسیده قوریلهدی.
