راپورونه وايي، د هندوستان حکومت پريکړه کړې، چې له پاکستان سره د کشمېر له لارې خپلې تجارتي راکړې ورکړې وتړي.
هندي چارواکو ویلي، چې د دغې تجارتي راکړې ورکړې مخه په (LoC) یا پر پاکستان د کنټرول په سیمه کې نېول شوې ده.
دوی ویلي، چې پاکستان د کشمير په صفري نقطه "پونچ" ولسوالۍ په (چاکا ـ داـ باغ) سیمه کې اوس هم ډزبند نهدی کړی.
دوی ادعا کوي، چې د پاکستاني مرمیو پهواسطه د کشمیر په صفري نقطه کې د تجارتي اسانتیاوو مرکزونو ته زیانونه اوښتي دي.
د " ټایمز ، اف انډيا" په نوم یوې هندي ورځپاڼې لیکلي، چې هندي مقاماتو د خپلو دغو ادعاوو یو دلیل دا راوړی، چې په تېره دوشنبه کې یو بس چې د کشمیر له پونچ ولسوالۍ نه د پاکستان راولکوټ ته روانه وه د پاکستاني پوځيانو لهخوا د احتمالي خطراتو له وجې درول شوې وه.
ورځپاڼې د هندوستان د (TFC) یا د تجارتي اسانتیاوو د مرکز مشر تنویر احمد له خولې ویلي، چې د چهارشنبې په ورځ د هندوستاني سوداګرو لهخوا له سوداگریزو توکو ډک موټر صفري نقطې ته لېږل شوی و، خو په چاکا – دا- باغ سیمې کې د پاکستاني پوځيانو ورته د "لاین اف بارډر" دروازه نه وه خلاصه کړې.
ده زیاته کړې، که څه هم هغوی هلته د زیاتې مودې لهپاره انتظار هم ویستلي، خو بیا هم ورته د ننوتو اجازه نه وه ورکړل شوې.
د راپور پر بنسټ، د هندوستان په جامو او کشمیر سیمه کې د تېر مارچ میاشتې په لومړۍ نیټه یو بس د اسلحو، بمونو او نورو تخریبوونکو وسلو سره ډک موټر ونیول شو.
دوی ادعا کوي، چې دغه وسلې زیاتره يې چینايې وې او د مظفرآباد ـ سریناګر پر لویه لاره کې يې نیولي و.
په راپور کې نهدي ویل شوي، چې د دغه بندر له لارې د پاکستان او هندوستان ترمنځ په کال کې په کومه اندازه تجارت کيږي؟
خو د پاکستان او هندوستان ترمنځ په دغه بندر تجارت له ۲۰۰۸ م میلادي کال راهیسې پېل شو، خو له هماغه وخت راهیسې دغه تجارت له دواړو خواونه له ځينو ستونزو سره مخ شوي دي.
