د افغانستان کرکټ بورډ لخوا خپره شوې خبرپاڼه کې راغلي چې د هندوستان کرکټ بورډ په رسمي توګه ومنله چې د افغانستان کرکټ پرمختګ سره ولاړ دی.
خبرپاڼه لیکي چې د هندوستان کرکټ بورډ دغه ژمنه د کرکټ اسیایي شورا په کلنۍ غونډه کې د افغانستان کرکټ بورډ له اجرایوي مشر شفیق الله ستانکزي سره په لیدنه کې کړیده.
دیادونې وړ ده چې د کرکټ اسیایي شورا کلنۍ غونډه د ۲ ورځو لپاره د مالیزیا په پلازمینه کولالمپورښار د کرکټ اسیایي شورا په مرکزي دفتر کې ترسره شوه.
خبرپاڼه لیکي چې د هندوستان کرکټ بورډ سکرترجنرال انوراګ ټاکور د کرکټ بورډ لخوا د هیواد د کرکټ پرمختګ لپاره د ټولو شویو وړاندیزونو هرکلی وکړ او ژمنه یې وکړه چې ډير ژر به ورته په رسمي ډول عملي بڼه ورکړي.
افغان کرکټ بورډ تراوسه له هندوستان څخه د غوښتل شویو مرستو په اړه جزییات ندي ورکړي خو وایي چې ډیر ژر به یې له هیوادوالو سره شریک کړي.
دیادونې وړ ده چې افغان کرکټ بورډ د کرکټ نړیوال جام سیالیو پای ته رسیدو وروسته په کابل کې له هند سفیر سره په لیدنه کې دا غوښتنه هم کړې وه چې د افغانستان کرکټ ملي لوبډلې د تمریناتو او د نړیوالو لوبډلو د کوربتوب لپاره ورته د هندوستان یو کرکټ لوبغالی په واک کې ورکړي.
په خپله د کرکټ بورډ اجرایوي مشر شفیق الله ستانکزي په کرکټ اسیایي شورا کې د ګډون او له هندي لوړ پوري کرکټ چارواکي انوراګ ټاکور سره د لیدنې وروسته په خپله فیسبوک پاڼه کې لیکلي دي چې د اوسنۍ ادارې موخه د اسیا او نړۍ ټولو کرکټ ادارو سره مثبتو اړیکو ته وده ورکول او هم له ټیسټ کرکټ لوبډلو څخه د هیواد د کرکټ د پرمختګ په موخه د ډیرو ګټو اخسیتل دي.
د ښاغلي ستانکزي په وینا چې هندوستان یو غني کرکټ لري او کولای شي چې په هراړخیزه توګه د لوړ کاري او تخنیکي ضرفیتونو په لرلو سره د افغانستان د کرکټ په پرمختګ کې مهم رول ولوبوي.
