دوې اوونۍ کېږي چې د هلمند ولایت په لښکرګاه ښار کې د پاکستانيو کلدارو په راکړه ـ ورکړه باندې بندیز لګېدلی؛ خو بیا هم خلک خپلې سوداګریزې معاملې په بهرنیو اسعارو تر سره کوي.
د لښکرګاه ښار هټیوال د کلدارو له بندښته خوشاله دي؛ خو وايي، دوی خپله عمده سودا په کلدارو اخلي؛ نو د پېر پرمهال اړ دي چې په کلدارو یې وپلوري. دوی په ټینګار سره وايي، که په افغانیو سودا وپلوري؛ د ګټې پرځای تاوان کوي.
د لښکرګاه اوسېدونکي حاجي مسجدخان هم له دولته د کلدارو پر بندیز خوشاله دي او هیله لري چې دا ستونزه د تل لهپاره حل کړي. دی پهدې برخه کې د ديني، عالمانو او عامو وګړیو مسوولیت هم بې څه نه ګڼي.
په ورته وخت کې د افغانستان بانک د هلمند د څانګې رییس عصمتالله فضلي وایي، د ولایت لهخوا کمېسیون ټاکل شوی او د دوی ماموران له یاد کمېسیون سره یوځاي د کلدارو پر بندیز کار کوي. د ښاغلي فضلي په خبره، دوی د خلکو د اړتیاوو د پوره کولو لهپاره ۲۲۳ میلیارده افغانۍ چاپ کړي او د بهرنیو پیسو په وجه د دوی د خزانې افغانۍ پهخپل ځای پاتې دي.
ده دا هم وویل چې د افغانستان بانک دومره افغانۍ لري چې د پاکستانیو کلدارو بدیل شي.
د هلمند ولایتي اداره داځل د کلدارو په راکړې ـ ورکړې د بندیز په برخه کې جدي ښکاري. د هلمند د والي ویاند عمر ځواک سلام وطندار ته وویل چې د څار لهپاره یې ځانګړی کمېسیون ټاکلی دی. ښاغلي ځواک زیاته کړه، کهچېرې څوک د کلدارو په راکړې ـ ورکړې ونیول شي؛ بانکي حسابونه به یی ضبط شي.
دا پهداسې حال کې ده چې پهدې وروستیو کې د افغانستان د لویو ښارونو په مرکزونو کې پر پاکستانیو کلدارو بندیز لګیدلی دی؛ خو په لېرې پرتو سیمو کې بیا د افغانیو راکړه ـ ورکړه کمه ده او ټولې سوداګريزې چارې په کلدارو او ایراني تومان کېږي.
