د هلمند ولایت ترافیکو د مدیریت مسوولین وايي، چې دوی ته د پلازمينې کابل نه امر شوی، چې باید ۵۰ زره موټر ودروي او پرزه يې کړي.
دوی وايي، د امر په اساس باید هغه موټر، چې ۵ کلن اسنادو وخت يې پوره شوی وي او د دغو موټرو شمېر شاوخوا ۵۰ زرو ته رسيږي باید پرزه شي.
د یاد ولایت د ترافیکو مدیر میرزا خان وايي، که څه هم دوی ته د پلازمينې کابل لهخوا امر شوی، خو د دوی مدیریت د ۵۰ زرو موټرو د پرزه کولو ظرفیت نهلري.
دغو موټرونو ته چې له قانوني لارې افغانستان ته وارد شوي یو ځل د پنځو کلونو لهپاره سندونه ورکړل شوي وو، چې اوس یې نیټه پوره شوې او اوس یې دولت د درولو پریکړه کړې.
خو د لښکرګاه ښار شاوخوا ۳۰۰ موټرچلوونکو د یکشنبې په ورځ د غونډې په ترڅ کې له دولته وغوښتل، چې پر دوی دې کار او غریبي نه دروي او دا ستونزه دې د تل لهپاره حل کړي.
دوی وايي، هغه موټرونه چې د ګمرک څخه راغلي دي دولت باید هغه ته پلیټ ورکړي.
رحیمي زیاته کړه، د موټر چلوونکو استازې دې له چارواکو سره خبرې وکړي، نو ځکه خو په همدې وجه یې د موټرونو درولو بهیر ځنډوي.
د معلوماتو لهمخې اوسمهال په هلمند ولایت کې شاوخوا ۷۰ زره موټرونه شته، چې د چارواکو پر وینا ښایي لس سلنه یې قانوني سند ولري.
