هلمند ولایتی پولیس قوماندانلیگینینگ بلند مرتبهلی رسمیلریدن بیری قوراللی طالبلر اوتگن کیچه (جمعه) ولایتنینگ موسی قلعه ولسواللیگیده ملی اردونینگ پوستهسیگه هجوم قیلیب 31 عسکر اولدیریلگن لیگینی ایتگن.
اوز نامی فاش ایتیلیشینی ایستمهگن مذکور شخصنینگ سلاموطندارگه بیلدیریشیچه، قوراللی طالبلر ملی اردو حربیلری شامل نیچهته تانکنی هم اوزلری بیلن آلیب کیتگن.
حادثهنی تصدیقلهگن جنگری طالبلرنینگ سوزلاووچیلریدن بیری قاری محمد یوسف احمدیگه کوره، طالبلر ملی اردونینگ ییریک بیر قرارگاهیگه هجوم قیلیب 31 حربینی اولدیریب و 7 عسکرنی اوزلری بیلن آلیب کیتگن.
احمدیگه کوره، مذکور اوروشده ملی کوچلرنینگ قورال اسلحهلری طالبلر طرفیدن قولگه کیریتیلگن.
امنیتی مسؤوللر طالبلرنینگ اوشبو ادعاسی توغریسیده هلی هیچ نرسه دیمهگنلر.
عین حالده ولایت کینگش اعضالری همده موسی قلعه ولسواللیگینینگ یشاووچیلری دولت بو ولسواللیک اوچون اعتبار قرتمهگن حالده، مذکور تومن تیزلیکده سقوط قیلیشی ممکن لیگینی ایتگنلر.
اولرگه کوره، حاضرهم ملی کوچلر بازارده قوراللی طالبلر بیلن اوروش قیلماقدهلر. ملی کوچلر اوچون تازه نفس حربی منطقهگه جونه تیلمهگن حالده، موسی قلعه ولسواللیگی مذکور ولایت نورزاد ولسواللیگینینگ تقدیریگه اوچهدی.
شونینگدیک موسی قلعه ولسواللیگینینگ اهالیسی طالبلر نورزاد ولسواللیگیده ملی کوچلردن قولگه کیرتگن حربی جهازلردن اوشبو اوروش ده فایده لنگنلر دیگن.
باشقه تاماندن هلمند ولایت کینگیشینینگ اعضالریدن بیری حاجی عبدالمجید آخند زادهگه کوره، حاضرده ملی کوچلر قیرق پوستهدن کیلیب ولسواللیک مرکزیگه جایلشگنلر. ایتلیشیچه، جنگ ده اولگنلر نینگ جسدی بیر هفتهدن بیری اوروش میدانیده قالماقده.
گزارشلرگه کوره، طالبلر همده ملی کوچلر اورتهسیده یوز بیرگن اوروشده هنوزگچه 30 تانگ و 30 ضد گلوله حربی موتر طالبلر قولگه توشگن.
عین حالده، هلمند ولایت والیسی نینگ سوزلاووچیسی عمر زواک موسی قلعهدهگی جاری اوروش توغریسیده معلومات بیریشدن باش تارتگن.
