د هلمند د مدني ټولنې ځينې غړي د ۵۰۵ م زون د نوي قومندان پر ګومارلو اندېښنه وښوده.
دوی وايي، چې دغه قومندان په فساد کې ښکېل دی او باید افغان حکومت د بل نوي قومندان پر ګومارلوغور وکړي.
دوی نن شنبه (اکټوبر ۱۷مه) د يوې خبري ناستې پرمهال د ولسمشر محمد اشرف غني څخه غوښتنه وکړه، چې د امنيتي وضعيت د سمون په موخه باید د ۵۰۵ م جنوبي زون نوی قومندان عصمت الله دولتزايي دې ژر تر ژره له دندې ګوښه کړي.
یاده دې وي، چې عصمت الله دولتزايي تېره ورځ د ولسمشر له خوا د ۵۰۵م زون له پاره د نوي قومندان په صفت و ټاکل شو.
د هلمند مدني ټولنې مشر سردار محمود همدرد نن د يوه رسنیز کنفرانس له لارې د ۵۰۵ زون له پاره د قومندان په ټاکلو د خواشيني څرګندولو ترڅنګ يې زياته کړه، چې یاد زون له پاره د دولتزايي ټاکل د ولسمشر له لوري يوه ناسمه پريکړه وه.
هغه قومندان دولتزايي په بې کفايتۍ تورنوي او اندېښنه ښيي، چې په اوسنيو شرایطو کې د ده ټاکل به جنوبي زون له ګڼو امنيتي ګواښونو سره مخ کړي.
د مدني ټولنې مشر سردار محمد همدرد وايي، په اختلاس تورن او له پخوا تجربه شوی شخص هيڅکله هم د امنیت راوستو جوګه نه شي کېدی.
دغه مدني فعالان وايي، چې باید د هلمند حالاتو له څېړلو وروسته وړ شخص يې پر ځای و ګومارل شي.
مدني فعال او لیکوال اغا محمد قریشي وايي، چې ولسمشر دې له خلکو سره په مشورې باید دغه پوست ته نوی شخص مقرر کړي.
بل لور ته د ولسمشر له لوري د ۵۰۵ جنوبي زون نوی ګومارل قومندان تورن جنرال عصمت الله دولتزايي سلام وطندار ته د مدني ټولنې ټول هغه خبرې ردوي، چې ګوندی دی په فساد او اختلاس کې لاس لري.
هغه وايي، چې که هر څوک پر ده د فساد او اختلاس په تړاو اسناد او شواهد لري، نو وړاندې دې کړي.
دولتزايي زیاتوي، تردې وړاندې چې هغه په هلمند کې د پولیسو د ۴۰۴ او ۷۰۷ م زون قومندان ټاکل شوی وو، نو تر کجکي ولسوالۍ پورې يواځې په موټر کې تګ را تګ کاوه.
د تورن جنرال عصمت الله په وينا، د هلمند اوسنی امنيتي وضعيت د زغملو وړ نه دی.
د نوموړي په خبره، د هلمند په ځانګړي ډول د خانشینه څخه تر کجکي پورې امنيتي وضعيت له پاره نور نوي پلانونه لري.
د ویلو ده، چې د روانې ميلادي میاشتې په ۱۵ مه نېټه د ارګ له لوري رسنيو ته په رالېږل شوې خبرپاڼه کې وویل شو، چې ولسمشر د ۱۰۱ اسمایي زون قوماندان لوی پاسوال عبدالرحمن رحیمي، د ۲۰۲شمشاد زون قوماندان مل پاسوال جوره بیک، د ۳۰۳سپین غر زون قوماندان پاسوال اسدالله شېرزاد، د ۴۰۴میوند زون قومانددان پاسوال معشوق احمد سېلاب، د ۶۰۶ زون قوماندان مل پاسوال حسن شاه، د ۷۰۷ پامیر زون قوماندان مل پاسوال میر امان الله ګذر او د ۸۰۸ کندز زون قوماندان لوی پاسوال شېر عزیز کامه وال د پولیسو د ساحوي زونونو قومندانانو سره وکتل او هغوی يې د خورا ښه وړتیا خاوندان یاد کړل، چې په دغو کې د ۵۰۵ هملند زون قومندان پاسوال عصمت الله دولتزايي هم شامل وو.
