هلمندنینگ لشکرگاه شهریده «کابل بانک» شعبه‌سیده یوز بیرگن خودکش هجوم‌ده 8 کیشی هلاک و باشقه 20 کیشی یره‌لنگن.
واقعه گواه‌لری‌نینگ ایتیشیچه، بیر موترگه مینگن خودکش هجومچی یانیده‌گی پارتلاوچی ماده‌نی تینچ اهالی و حربی عسکرلر اورته‌سیده پارتلتگن. اولرنینگ ایتیشیچه، بو هجوم قربانلری بیریلگن رقم‌دن آرتیق دیر.
لشکرگاه شهری امنیتی بیرینچی حوزه آمری عبدالقیوم بارک‌نینگ ایتیشیچه، بو هجوم حربی کوچلر و تینچ اهالی کابل بانک‌نینگ اونگیدن توپله‌نیب تورگن بیرچاغده یوز بیرگن.
بیراق، امنیتی منبع‌لردن باشقه بیری‌نینگ ایتیشیچه، بو هجوم‌ده 4 حربی و 4 تینچ اهالی هلاک بولگن.
آتی فاش ایتیلیشی‌نی ایستمه‌گن هلمند تیز یاردم کسلخانه‌نی بیر داکتری‌نینگ سلام‌وطندارگه ایتیشیچه، حاضرگچه 20 یره‌دار بو کسلخانه‌گه آلیب کیلینگن.
قوراللی طالب‌لر، اوشبو هجوم مسؤولیتی‌نی بوینیگه آلگن. مذکور گروه‌نینگ سوزلاوچیسی ذبیح‌الله مجاهد، اوز تویتر صحیفه‌سیده یازیب، مذکور خودکش هجوم نتیجه‌سیده، پول آلیش اوچون کابل بانک بارگن 39 عسکر هلاک ایتیلگنینی ایتگن.
