هلمند‌ده تشقی کوچلرنینگ هوا هجومی‌ده چیگره پولیس‌لریدن 8 ته‌سی هلاک و 16 ته‌سی یره‌لنگن. هلمند‌ده آتی فاش ایتیلیشی‌نی ایستمه‌گن چیگره پولیس‌لریدن بیر منبع‌نینگ سلام‌وطندارگه ایتیشیچه، اوشبو واقعه جمعه‌دن شنبه‌گه اوتر کیچه ساعت 11 اطرافیده، مذکور ولایت‌نینگ نادعلی تومنی لوی‌باغ منطقه‌سیده یوز بیرگن.
منبع‌گه کوره، بو منطقه‌ده ملی پولیس و چیگره پولیس‌لری‌نینگ قوشمه پوسته‌لری بار ایکن و کیسکین حمایه‌وی کوچلر، طالب‌لرنی نشان‌گه آلیش اورنی‌ده مذکور پوسته‌لرنی نشان‌گه آلگن و نتیجه‌ده چیگره پولیس‌لریدن 8 ته‌سی هلاک و باشقه 16 ته‌سی یره‌لنگن. منبع‌نینگ کوپه‌یتیریشیچه، هلاک ایتیلگن عسکرلرنینگ کییمی شخصی ایکن و شونینگ‌دیک، بو هوایی هجوم‌ده 15 طالب هلاک ایتیلگن.
سلام‌وطندار بیلن صحبت اوتکزگن هلمند حاکمی سوزلاوچیسی عمر زواک، بو واقعه‌نی تصدیق‌له‌یدی، بیراق ایتیشیچه، حاضرگچه بو عسکرلر قنده‌ی بیر شکلده هلاک ایتیلگنی معلوم ایمس. اونگه کوره، اوتگن کیچه بو منطقه‌ده تشقی کوچلر بیلن طالبلر اوروشگن‌لر و نتیجه‌ده چیگره کوچلریدن 2 ته‌سی هلاک بولگن، 4 ته‌سی یره‌لنگن و شونینگ‌دیک، 15 طالب اولدیریلگن.
شونینگ‌دیک، آتی آلینیشی‌نی ایستمه‌گن چیگره کوچلریدن باشقه بیر منبع‌نینگ ایتیشیچه، اوتگن کیچه تشقی کوچلر بیلن طالبلر اوروشمه‌گن‌لر، بلکیم هوایی هجوم اویوشتیریلگن و نتیجه‌ده چیگره کوچلریدن 10 ته‌سی هلاک و باشقه 16 ته‌سی یره‌لنگن.
بو بیرینچی مرته کیم، کیسکین حمایه‌وی کوچلر هلمند‌ده چیگره کوچلرینی هوا دن نشان‌گه آلگن. افغانستان بوییچه کیسکین حمایه‌وی کوچلر قومندانی، حاضرگچه بو هجوم توغریسیده هیچ نرسه دیمه‌گن.
