په هلمند کې له وروستي خونړي موټربم چاودنې وروسته د نارينهوو ترڅنګ اوس ښځينهوو هم د سولې خېمه درولې.
د هلمند په مرکز لښکرګاه کې د غازي محمد ايوب خان لوبغالي مخې ته د تېرې جمعې ماښام موټربم برید د ۱۵ کسانو ژوند واخیست او ۵۵ نور یې ټپیان کړل.
د دغه بريد په غبرګون هلمندي وګړیو او مدني فعالانو د پېښې پر ځای د سولې خېمه درولې چې نن له دغه بهير سره ګڼې هلمندۍ ښځينه هم همغږې او د نارينهوو خېمې ترڅنګ يې د سولې خېمه ودروله.
د هلمندي سوله غوښتونکیو ښځو په ډله کې هغه مېرمن هم شته د وري درېیمې نېټې موټربم برید کې يې زامن او د ژوند ملګری وژل شوي دي.
دې ویرجنې مېرمنې سلاموطندار ته د خپل زړه درد داسې څرګند کړ:«زموږ نازک – نازک شهيدان، زما پنځه بچيان او زما کوروالا په دغه جنګ کې ولاړل؛ د خدای او قران پرمخ، سوله وکړئ».
تر دې مخکې هلمندي سوله غوښتونکیو ځوانانو او مدني فعالانو ویلي و چې تر پنځو ورځو پورې کور پر کور ګرځي، خلک راټولوي او بيا د جګړې مرکزونو ته ورځي، طالبانو ته ورځي او د سولې دا غوښتنه مخامخ کوي.
له دې سره سم د دغه خوځښت غړي پرون ښار او د ولسواليو څنډو ته وتلي وو، پر موټرو يې د سولې شعارونه ځړولي او په لوډسپېکرونو کې يې د سولې غوښتنه کوله.
دغه ولسي حرکت چې درې ورځې يې پوره شوي په پام کې لري راتلونکې پنج شنبې هلمند کې د طالبانو تر ولکې لاندې ولسواليو ته په ورتلو له طالبانو مخامخ د سولې غوښتنه وکړي.
