هلمند ولایتینینگ ینگی حاکمی حیاتالله حیات، اوتگن (یکشنبه کون) بو پستگه تعیین ایتیلگن، شوندهی بیرحالده، اوتگن (دوشنبه کون) مذکور ولایتنینگ قوم بویوکلری بیلن اوتکزگن ییغینیده ایتیشیچه، اورگهتیش و تربیهلش قیینچیلیکلرینی حل ایتهدی. هلمندده 140 دن آرتیق مکتب یاپیلگن و اوشبو ولایتنینگ ینگی والیسی، تیزلیکده بو مکتبلر دروازهسی آچیلیشیگه سوزبیردی.
هلمند والیسی بیلن بولگن اوچرهشووده ولایتی کینگش اعضالری، قوم بویوکلری و مدنی فعاللر، مذکور ولایتنینگ معارف ریاستیده اداری فساد میزانی آشگنیدن تنقید قیلیب ایتیشیچه، هلمند مکتبلریدن کوپینچهسی اداری فساد و بیرقطاری شخصی بیلشوولر باعث، یاپیلگن.
هلمندنینگ ولایت کینگشی باشلیغی محمدکریم اتلنینگ ایتیشیچه، اوشبو ولایت معارف ریاستی فسادگه باتگن. جناب اتلگه کوره، مذکور ریاستنینگ اورین باسرلری، هر بیر هفته اوزگرهدی؛ مکتبلرنی یاپیلیشی هم شو مسئلهگه باغلیق بولگن.
بیراق، مذکور ولایت معارف ریاستی باشلیغی عبدالمتین جعفر، اوشبو ادارهده فساد موجودلیگینی رد ایتیب، مکتبلرنی یاپیلیش دلیلی ناتینچلیکلر دییدی. اونگه کوره، بو مسئله باشقه بولیملر اوستیگه هم سلبی تأثیر تشلهگن.
هلمند افغانستان جنوبیده جایلشگن ناتینچ ولایتلردن بیری بولیب، قوراللی طالبلر کینگ شکلده جایلشگن. اوروش دوامی و ناتینچلیکلر کینگهییشی باعث، هر ییل اوشبو ولایتده کوپینچه مکتبلر یاپیق قالهدی.
