هرات کې د ټاکنو پروسې ملاتړ وشو

د هرات زرګونو اوسېدونکیو، سیاسي او مدني فعالانو نن د دې ولایت مخې ته راټول شوي وو او په یوه غږ یې د ولسي جرګې او ولسمشریزو ټاکنو پروسې ملاتړ وکړ.

د هرات اوسېدونکي عین‌الدین اماني او احمدسعید عظمیان په‌دې اړه سلام‌وطندار ته وویل، هراتیان د ولسي جرګې او ولسمشریزو ټاکنو ملاتړ کوي او په‌کې ځنډ، لاسوهنې او د لنډمهالي حکومت جوړېدو له‌پاره هڅې ورته د منلو نه‌دي.

دوی زیاتوي، حکومت، په ځانګړي ډول د ټاکنو کمېسیون دې د راتلونکیو پارلماني او ولسمشرۍ ټاکنو له‌پاره بشپړ چمتووالی ونیسي او هغه کړۍ چې د ټاکنو پروسه کې خنډونه جوړوي یا هم نه غواړي پر خپل وخت ټاکنې وشي، دوی به یې پروړاندې ودرېږو.

په همدې حال کې د دې غونډې دوه ګډونوالې فرزانه او نفیسه وايي، دا ځل باید هغو کسانو ته رایې ورکړو چې د خپلو شخصي ګټو پرځای، ملي ګټو ته لومړیتوب ورکړي او زموږ ښه استازولي وکړي.

بلخوا د هرات د والي ویاند جیلاني فرهاد وايي، هڅه کوي چې په‌دې ولایت کې د رڼو ټاکنو کولو له‌پاره تدابیر ونیسي. د فرهاد په وینا، امنیتي ځواکونه د هرات په بېلابېلو ولسوالیو کې عملیاتو کوي او د ټاکنو تر ورځې به د ټولو ټاکنیزو سایټونو بشپړ امنیت ونیسي.

د هرات اوسېدونکي داسې مهال د ټاکنو پروسې ملاتړ کوي چې څو ورځې وړاندې د افغانستان ستر ملي اېتلاف د هرات په ګډون یو شمېر ولایتونو کې د ټاکنو کمېسیون ولایتي دفترونه وتړل.