تېر مازدیګر پر کورونا ویروس د اخته یوه کس په ګډون، ۳۸ شکمن کسان په هرات کې د کورونا د درملنې او تجرید له مرکزه وتښتېدل، خو له یوې شپې وروسته یې ۷ هغه بېرته دغه مرکز ته راغلل.
بېرته راغلي ناروغان له دغه مرکزه تېښته ردوي او وايي، ناروغان د روغتیايي مسوولانو د نه پاملرنې، د روغتیایي امکاناتو، په ځانګړې توګه د ماسک او دستکشو نه موجودیت او د ازمایښتي پایلو په نه راتلو کې یې د ځنډ له امله دا مرکز پرېښی دی.
فرېبا چې پر کورونا ویروس یوه شکمنه اخته ناروغه ده، پرون د کورونا د درملنې او تجرید له مرکزه وتلې وه او اوس بېرته راغلې ده.
هغه د روغتیايي امکاناتو او ان په دغه روغتون کې د درملو پر نه موجودیت نیوکه کوي او وايي، یو پاکټ ګولۍ په ۱۲۰۰ افغانۍ پېري.
په هرات کې پر کورونا ویروس یو بل شکمن کس جاناقا چې له ۶ ورځو راهیسې په حوزوي روغتون کې د کورونا د درملنې او تجرید مرکز کې دی، په روغتون کې د روغتیايي امکاناتو پر نه موجودیت او په هرات کې د کورونا ناروغانو پر وړاندې د حکومت پر نه پام نیوکه کوي.
هڅه مو وکړه چې د عامې روغتیا ریاست نظر هم واخلو، خو د دې ادارې مسوولان په دې اړه ځواب ویلو ته حاضر نه شول.
خو د هرات د حوزوي روغتون سرطبیب عارف جلالي وايي، د عامې روغتیا اداره د وزارت له مرستیالې سره په ګډه هڅه کوي چې دا ستونزه هواره کړي.
بل لور ته د عامې روغتیا وزارت مالي او اداري مرستیاله ماموسۍ زېور وايي، په هرات کې د کورونا د ازمایښت لپاره د لابراتوار جوړولو هڅې روانې دي او په پام کې ده چې د ډبلیواېچاو موسسې یو ټیم هرات ته راشي او په دغه ولایت کې د لابراتوار د جوړولو شرایطو له ارزولو وروسته په راتلونکې یوه یا دوو اوونیو کې یو لابراتوار جوړ کړي.
