همدا چې د فیروز کوه ښار سړک ته سر ورښکاره کړئ؛ سترګې به مو په هغو ماشومانو ولګېږي چې یا به موټرسایکل چلوي او یا به هم د موټر شترینګ ته ناست وي او په ډېرې ارامۍ سره به موټرواني کوي.
د بېسنده او د قانوني سن نه لرونکي موټر چلوونکیو ارامي؛ د ښار اوسېدونکي ډېر زیات پرېشانه کړيدي؛ ځکه چې هم ښاریان او هم د فیروزکوه ښار د مرکزي روغتون مسوولان پهدې اند دي چې د پېښو ډېر عاملان ماشومان دي.
د دوی په خبره، د غور ټرافیکو مدیریت د پېښو د مخنیوي او د قانوني سن نه لرونکیو موټرچلوونکیو منعه کولو په برخه کې هېڅ هم نهدي کړي.
محمد مشفق او عبدالستار سنجر د فیروز کوه ښار اوسېدونکیو سلام وطندار ته وویل، غیرمجاز سرعت، د جادو او سړکونو خرابوالی او په ښار کې د ټرافیکي نښو او څراغونو نهشتوالی پهدې ولایت کې د ټرافیکي پېښو یو شمېر نور لاملونه دي.
د دوی په خبره، ډېر ماشومان د بډایو کورنیو غړي دي چې موټرې یې په واک کې ورکړي او هغوی په سړکونو او ښار کې ټرافیکي اشارې او نښو ته پام نهکوي.
د غور د مرکزي روغتون سرطبیب محمدنصیر پارسا هم وایې، دې روغتون ته د ټرافیکي پېښو ډېر کسان کمعمر ماشومان دي. د ده په خبره، د روان کال له پیله تر اوسه د ټرافیکي پېښو نږدې ۱۰۰۰ تنه ټپیان ور وړل شوي چې له ډلې یې له۱۰ ډېر وژل شويدي.
د غور د ټرافیکو مدیر ښاغلی محمد یعقوب ابراهیمي په فیروزکوه ښار کې د ماشومانو په موټرچلونې سترګې نه پټوي؛ خو وایي چې دوی د ټرافیکي پېښو د مخنیوي او په ماشومانو د موټر چلونې بندیز لګولو په برخه کې خپلې هڅې کړي. دی زیاتوي، ټرافیکي پېښې په ښار کې د ولسي جرګې ټاکنو پرمهال د ډېرې ګڼېګونې له امله ډېرې شوېدي.
د غور په شان ولایت کې ـ چې هلته د ټپیانو لهپاره روغتیايي اسانتیاوې کمې دي ـ د ټرافیکې پېښو زیاتېدل ښایي ډېره ځوروونکې ځکه وي چې همدا ټپیان بیا د متخصصو ډاکټرانو او سم تشخیص د نهشتوالي له امله دې ته تیار وي چې د بدن غړي یې پرې شي.
