هرات ولایتی محلی رسمیلرینینگ ایتیشیچه، مذکور ولایت شیندند تومنیده طالبان گروهی ایکی قومندانی ملا صمد و ملا ننگیالی اورتهسیدهگی قرهمه قرشیلیک، اوشبو گروه جنگریلری اورتهسیده توقنهشووگه سبب بولگن.
هرات والیسی سوزلاوچیسی احسانالله حیاتنینگ سلاموطندارگه ایتیشیچه، بوگون (دوشنبه) ایرتهلب ساعت بیش اطرافیده «زیرکوه» قیشلاغیده، مذکور ایکی قومندان جنگریلری اورتهسیده قتیق توقنهشوو باشلهنیب و حاضرگه قدر دوام ایتگن.
جناب حیاتنینگ ایتیشیچه، اولرگه ییتیشگن گزارشلر اساسیده، حاضرگچه ملا صمد جنگریلریدن 6 کیشی و ملا ننگیالی جنگریلریدن 5 کیشی، توقنهشوو جریانیده هلاک بولگن و باشقه ایکی تاماندن 10 جنگری یرهلنگن.
هراتده آتی فاش ایتیلیشینی ایستمهگن بیر امنیتی منبعنینگ سلاموطندارگه ایتیشیچه، اوشبو توقنهشوو جریانیده طالبلر تامانیدن شیندند تومنیده ولسوال قیلیب تعیین ایتیلگن ملا صمد هم هلاک بولگن.
گزارشلر اساسیده، سونگی پیتلرده طالبان گروهی اورتهسیده توقنهشوولر کوپهیگن. شونینگدیک، اوتگن هفته پاکستان مملکتی کویتهده، مذکور گروه جنگریلری اورتهسیده یوزبیرگن توقنهشووده، اوشبو گروه رهبری ملا اختر محمد منصور یرهلنگن ایدی.
شونینگدیک موجود گزارشلرگه کوره، ملا منصور توقنهشوودن بیرکون اوتگنیدن کیین، یرهسی آغیرلیگی باعث، جان بیرگن و ملا هیبتالله آخندزاده، طالبان گروهی وقتینچهلیک باشلیغی صفتیده تعیین ایتیلگن؛ بیراق طالبان گروهی بیر خبرنامه ترقهتیب، ملا منصورنینگ، اولیمی و یرهلنگنینی رد قیلدی.
شونینگدیک، هرات والیسی سوزلاوچیسینینگ ایتیشیچه، ملا منصورنینگ یرهلنگنی خصوصیده، خبر نشر ایتیلگنیدن کیین، اوشبو گروه جنگریلری اورتهسیده قرهمه قرشیلیکلر اوج آلگن.
طالبان گروهی حاضرگچه بو توغریده هیچ نرسه دیمهگن.
