امریکه مدافعه وزیرلیگینینگ اخیرگی گزارشیده ترورچی گروهلر افغانستان حدودینی اوز ایچلریده بولگنی قید ایتیلگن.
مذکور گزارشده، کویته کینگشی یا طالبلر گروهی میلادی 2015-ییلده قندهار، هلمند و ارزگان ولایتلرینی تصرف قیلیش و حقانی ترماغی ایسه خوست، پکتیا و پکتیکا ولایتلرینی آلیشنی نیت قیلگنی یازیلگن.
شونینگدیک امریکه مدافعه وزیرلیگی نینگ گزارشیده وردک، غزنی و زابل ولایتلریده القاعده جنگریلری ییرلشگنی و ننگرهار، کنر، نورستان و بدخشان ولایتلریده ایسه داعشنی نفوذ قیلگنی قید ایتیلگن. مذکور گزارشنینگ معلوم قیلیشیچه، اوشبو ترورچی گروهلر افغانستان نینگ ایریم معین حدودلرینی اوز اختیارلریگه آلیشنی نظرده توتگن.
هلمند و قندهار طالبلرنینگ اساسی سنتی مرکزلریدن. آلدینلرده مذکور ولایتلر طالبلر گروهی اوچون اجتماعی فعالیت مرکزی بولگن. خوست، پکتیا و پکتیکا ولایتلریده حقانی ترماغی مرکزلهشیشی حیرتلی بیر مساله. حقانی ترور ترماغینینگ ایکینچی اساسچیسی مولوی جلالالدین حقانی نینگ اوغلی سراجالدین حقانی دیر. او خوست ولایتیده دنیاگه کیلگن. شونینگدیک حقانی میلادی 1980- ییللرده مملکت نینگ شرقی ولایتلریده شوروی قیزل قوشینیگه قرشی حربی اوروش قیلگن.
جلالالدین حقانی؛ ایکی تن قوریقچیسی بیلن
مولانا جلالالدین حقانی زدران قبیلهسیگه تیگیشلی، اولرنینگ یشش ییری مملکت شرقی ولایتلری. مذکور گروه اوتگن یللرده اوشبو ولایتده قانلی ترورچیلیک حادثهلرنی عملگه آشیرگن. شونینگدیک حقانی ترور ترماغی اوتگن ییل پکتیکا ولایتیده هم بیر سپورت میدانینی نشانگه آلگن ایدی، بو حادثهده اونلب تینچ اهالی حیاتدن کوز یومگن ایدی.
امریکه مدافعه زویرلیگینینگ گزارشیده کیلگن قیزیق موضوع، القاعده جنگریلر وردک، غزنی و زابل ولایتلریده جایلیشگنی دیر. جنوبی وزیریستانده پاکستان حربیلر تامانیدن اوتکزیلگن حربی عملیاتلردن کیین خارجی ترورچیلر مذکور منطقهنی ترک قیلیب، افغانستانده طالبلر تصرفیده بولگن منطقهلرده ییرلشگن. وردک، غزنی و زابل ولایتینینگ ایریم حدودلری بو گروه آرقهلی باشقریلیشی ادعا میزنینگ اثباتی دیر.
بو جنگریلر اوچون اوروش قیلیش اساسی نیت. مذکور عصیانچیلر کورینیشیچه افغانستانده هلاک بولیشی نی مقصد قیلگنلر. افغانستان و امریکه مدافعه وزیرلیگی اورتهسیده امضالنگن کیلیشووگه کوره، امریکه قوشمه ایالتلرینینگ مخصوص حربیلری ایریم وقتلرده ترورچیلرگه قرشی عملیات اوتکزیش صلاحتیگه ایگه.
بناً القاعده ترور ترماغی امریکه قوشمه ایالتلری مخصوص کوچلری تامانیدن نشانگه آلینیشی ممکن.
اما، داعش گروهی ننگرهار، کنر و بدخشان ولایتلریده مرکزلهشیشی ایریم جدی خواطرلرگه سبب بولماقده. داعش گروهی نینگ افغانستان شرقی بولمیش بدخشان ولایتیده مرکزلهشیشی اوشبو گروهنی اوروش دامنهسینی مرکزی آسیاگه قدر چوزیش احتمالی بارلیگی تخمین قیلینهدی.
سعودی عربستانی جنوبی چیگرهلریده روسیه اوچون فرسایشی مصروفیتلرنی خلق قیلیشگه قتیق اشتیاق مند. عربستان روسیهنینگ سوریه برابریدهگی موضعیدن جدی خواطرده. روسیه سوریه دیکتاتوری بشاراسد دن قتیق حمایت قیلمه گنده ایدی، بیرلشگن ملتلر تشکیلاتینینگ خوفسیزلیک کینگشیده گی قطع نامه دمشق اوچون تصدیقلهنیب سوریهنی هوادن هجوم گه آلینیش اجازهسی بیریلیشی ممکن ایدی. بوندهی بیر ایش عملگه آشیریلگن حالده، بشار اسد قذافی تقدیرگه دچار بولیشی هیچ گپ ایمسدی.
اما، پوتین نینگ قاطع موضعگرلیگی عربستاننی اوز هدفیگه ایریشیشدن قویدی. انه شو دلیل اوچون هم سعودی عربستانی مرکزی آسیاده روسیه اوچون باش آغیریش تاپیشدن نا خرسند ایمس. حاضرگی کونده کویت دن نیچه تلویزیون ترماغی مرکزی آسیا دولتلری جملهدن تاجیکستانگه ضد برنامهلر نشر قیلهدی.
بناً داعشنی افغانستان شرقیده مستحکملهنیشی خارجی حمایتگه ایگه. افغانستان شرقیدهگی داعش جنگریلری عربستانلیک بای شیخلر و پاکستاندهگی حمایتی ترماقلری آرقهلی مالیوی حمایهلهنیشلری احتمالدن بوش ایمس.
شونینگدیک وردک، زابل وغزنی ولایتلریدهگی جنگریلر هم نهایتده داعش صفیگه قوشیلیشی ممکن. استخباراتی گزارشلرگه کوره، القاعده ترماغی خلج فارس مملکتلریدن قولگه کیریتهدیگن مالی همکارلیکلرنی قولدن بیرگنی اوچون بعضی احتماللرهم موجود. بو منبع لر حاضر داعشنی حمایت قیلیشی تخمین قیلینهدی. انه شو سبب ایریم ترورچی گروهلر دنیا بویلب داعشگه قوشیلیشگه حرکت قیلماده.
القاعده گروهی نینگ ایریم کوچلری افریقاده ینگیدن داعشگه قوشیلگن.
مرکزی آسیا مملکتلری جملهدن افغانستان، چین و روسیه ناتو همکارلیگی بیلن مذکور امنیتی تهدیدلرگه قرشی کورهشیشی کیرهک. ترورچیلرگه قرشی کورهشیشنینگ بیرینچی یولی افغانستان ملی امنیتی ادارهلری جملهدن ملی اردو، پولیس و ملی امنیت کوچلری حمایت قیلیشلریگه جدی احتیاج بار .
