هرات ولایتی گه سفر قیلگن مملکت ایکینچیلیک، چارواچیلیک و سوولنتیریش وزیرلیگی‌نی وزیری نصیراحمد درانی، کمیده 60 میلیون افغانی ارزشی بولگن مملکت زعفرانی بیرینچی انستیتوتی‌نینگ تمل تاشی‌نی قویدی.
جناب درانی، زعفران انستیتوتی ایجاد ایتیلیشیدن مقصد، زعفران توغریسیده تدقیقات اوتکزیش، اوشبو اوسیم‌لیک رواجلنتیریلیشی و افغانستان زعفرانی اوچون بازار تاپیش دیب ایتیشیچه، مذکور انستیتوت ایکی ییل جریانیده ایکینچیلیک وزیرلیگی‌نینگ بودجه‌سیدن مالی حمایه بولیب و فایده‌لنیش‌گه تاپشیریله‌دی.
ایکینچیلیک و چارواچیلیک وزیری گه کوره، مذکور انستیتوت‌نینگ قوریلیش ایشی یکونلنگنیدن سونگ، برچه کیره‌کلی جهازلری تیارلنه‌دی.
ایکینچیلیک وزیری‌نینگ کوپه‌یتیریشیچه، ترکیه مملکتی نیازی بولگن زعفران‌نی افغانستاندن تیارلش‌گه قرار قیلگن.
اونگه کوره، ترکیه گه ییل‌ده 300 کیلوگرام زعفران کیره‌ک و بونچه زعفران افغانستان اینیقسه هرات ولایتیدن مذکور مملکت گه صادر قیلینه‌دی.
درانی‌نینگ کوپه‌یتیریشیچه، بونگه علاوه تورک‌لر هرات زعفرانی اوستیگه سرمایه یاتقزیش‌گه علاقه کورستگن و بو اوسیم‌لیک‌نی پروسس و بسته‌بندلیک قیلگنیدن سونگ، افغانستان‌نینگ آتی گه صادر قیله‌دی.
عین حالده، هرات ولایتی‌نینگ سرپرستی محی‌الدین نوری‌نینگ ایتیشیچه، ترکیه مملکتی زعفران صادراتی گه بولگن گمرکی تعرفه‌لرنی 30 فایزدن صفرگه کمه‌یتیرگن و بوندن سونگ، افغانستان زعفرانی قولی‌لیک بیلن ترکیه گه صادر بوله‌دی.
افغانستان ایکینچیلیک، چارواچیلیک و سوولنتیریش وزیرلیگی‌نی وزیری هرات ولایتی گه قیلگن سفریده زعفران انستیتوتی‌نینگ تمل تاشی قوییلیشی گه علاوه، 600 میلیون افغانی ارزشی بولگن باشقه نیچه ایکینچیلیک پروژه جمله‌دن سوو توغانلری، سوو ییتکزیش کاناللر و هرات ولایتی‌نینگ ایریم تومن‌لریده سلما سوو توغانی‌نینگ سووی‌نی مدیریت قیلیش پروژه‌لر آچیلگن.
