هرات پولیسی نینگ رسانه دفتری سرپرستی عتیق‌الله وثیق بو خبرنی تصدیق‌لب ایتیشیچه، قتناو یول کندک کوچلری نینگ بیر تانکی یول چیککه‌سیده ییرلشتیریلگن ماین گه دوچ کیلیشی باعث، 3 عسکر هلاک و باشقه 3 عسکر ایسه یره‌لنگن.
اوشبو حادثه بوگون (شنبه 31- جوزا) توشدن آلدین ساعت 11 اطرافیده هرات – اسلام قلعه قتناو یولیده یوز بیرگن.
حادثه مسئولیتی نی حاضرگچه بیرار گروه یا-ده شخص بوینیگه آلمه‌گن.
عین حالده، اسلام‌قلعه بندر کمیساری مهرالله بلوچ نینگ سلام‌وطندارگه ایتیشیچه، مذکور امنیتی کوچلر اسلام‌قلعه تامان کیته‌دیگن هرات گمرک باشلیغی حمدالله همدرد مینیلگن موترنی یولداش‌لیک قیله‌دی ایکن.
اونگه کوره، بو پارتلش اسلام‌قلعه شهرچه بازاری نینگ کیریش ایشیگی‌ده یوزبیرگن.
هرات گمرک باشلیغی حمدالله همدرد نینگ ایتیشچه، طالبان گروهی پسترمه قویگن ایکن کیم تانک یول چیککه‌سیده ییرلشتیریلگن ماین گه دوچ کیلگنیدن کیین، اونینگ موتری هم هجوم آستیده آلینگن، بیراق هیچ کیم ضرر کورمه‌گن.
جناب همدرد گه کوره، اوتگن نیچه کونده نیچه مرته مذکور گروه آرقه‌لی تهدید بولگن. طالبان حاضرگه بو حقده فکر بیلدیرمه‌گن.
ایتیش کیره‌ک کیم هرات گمرک باشلیغی فساد گه عیب‌لنگن و ینگی‌لیکده جمهوررئیس آرقه‌لی گمرکلر اداره‌سی نینگ باشقه نیچه رسمی‌سی بیلن ممنوع‌الخروج اعلام قیلینگن.
