بوگون سهشنبه ایرتلب مملکت غربیده جایلشگن هرات ولایتیده یوز بیرگن ترافیک حادثه ده ایکّی کیشی حیاتدن کوز یومگن و واقعه ده باشقه 29 نفر آغیر و یینگیل یرهلنگن.
حادثه بوگون ایرتلب تانگ وقتی بیلن ساعت 4 ده ادرسکن وسواللیگی نینگ خواجه عوریای زیارت منطقهسیده یوز بیرگن.
هرات ولایت والیسی سرپرستی نینگ سوزلاووچیسی احسان الله حیات نینگ سلاو وطندارگه ایتیشیچه، یولاووچیسی بولگن 303 رسوملی موتر هرات ولایتیدن فراه تامانگه حرکتده بولگنده یولدن چیقیب کیتگن.
جناب حیاتنینگ ایتیشیچه، واقعه ده ایکّی کیشی عالمدن کوز یومگن و باشقه 29 کیشی ایسه آغیر و یینگیل یرهلنگن.
سوزلاووچی، تلفات آلدی آلینیشی اوچون حادثه ده یره لنگنلر برچهسی ملی کوچلر یاردمی بیلن ساغلیقنی سقلش ادارهسیگه ییتکزیلگن لیگینی بیلدیرگن.
هرات حوزهی ساغلیقنی سقلش ادارهسی نینگ سوزلاووچیسی محمد رفیق شیرزی، واقعه ییریدن فقط 13 کیشی آلیب کیلینگن لیگینی ایتگن. اونگه کوره، یرهلنگن لردن ییتی تهسی نینگ احوال یامان بولگن.
جاری ییلده هرات – قندهار عمومی ترانسپورت قتناوو یولیده بو بیشینچی مرته دیرکه بوندهی قانلی حادثه یوز بیرهدی.
هرات ولایت امنیتی مسووللری، ولایتده ترافیک حادثهلری آشگن لیگیگه بیرینچی دلیل هیداووچیلرنینگ تفاوت سیزلیگی سبب بولیشینی ایتگنلر.
عمومی یویللرده ترافیک بیلگیلری بولمهگنلیگی، یوللر معیاری ایمسلیگی و هیداووچیلر آرقهلی ترافیک قانونلری نظرده توتیلمهگن لیگی کبی مسالهلر مملکت بویلب ترافیک واقعهلر سانی آشگنلیگیگه اساسی عامل بولگنی تاکیدلنهدی.
