په افغانستان کې د امریکايي ځواکونو او غوڅ ملاتړ ماموریت قوماندان جنرال جان نیکلسن په بروکسل کې یو خبري غونډې کې طالبانو د درنو وسلو په ځانګړي ډول د هاموې ټانکونو په لاس ورتللو په اړه اندېښنه څرګنده کړه او ویې ویل، ډېرې درنې وسلې چې د طالبانو لاس ته ورځي؛ د پولیسو له لېرویو تالاشیو او کمربندونو څخه دي.
دی زیاتوي، د افغان امنیتي ځواکونو د تهاجمي ځواک او پياوړتیا لهپاره له دې ځواکونو ته د پوځي مشورو په ورکولو سره مرسته کوي او دوښمن ته د درنو وسلو د په لاس ورتللو په برخه کې د مخنیوي په پار افغان ځواکونو تشویقوي چې امنیتي تالاشۍ کمې کړي، ځکه چې دا تالاشۍ د هېواد په لېرو سیمو کې دي او له هغو دفاع سخت دی، په همدې دلیل طالبان هغه په خپل کنټرول کې راولي او وسلې یې له ځانه سره وړي.
هغه د خپلو خبرو په یوې برخې کې له طالبانو سره د حکومت د سولې په اړه وویل، د ولسمشر غني د سولې د وړاندیز شوې بستې په اړه د نړۍ عمومي ملاتړۍ او همدرانګه د جنوبي اسیا لهپاره د امریکا نوې سټراټيژي دا هیله پیدا کوي چې حکومت او طالبان ډېر ژر د سولې خبرې اترې پيلوي.
ښاغلي نیکلسن پهدې غونډه کې د افغان امنیتي ځواکونو تهاجمي بریدونه وستایل. ده د بېلګې په ډول د طالبانو له لوري د کورنیو چارو وزات پر ودانۍ برید یاد کړ چې د افغان امنیتي ځواکونو له لوري په ډېر کم وخت او کمو تلفاتو سره مهار شو.
د ناټو غړیو هېوادونو د دفاع وزیرانو په غونډه کې د افغانستان په استازیتوب د دفاع وزیر طارق شاه بهرامي او د ملي امنیت رییس معصوم ستانکزي ګدون کړی دی.
ولسمشر غني د پنچ شنبې په ورخ ټولو امنیتي او دفاعي ځواکونو ته هدایت وکړ چې د روژې له ۲۷مې د اختر تر ۵مې نېټې د افغان وسلهوالو طالبانو پر وړاندې خپل ټول یرغلیز عملیات ودروي؛ خو په ورته وخت کې یې وویل چې د القاعده، داعش او نورو نړۍوالو ترهګریزو ډلو پر وړاندې دې خپلو عملیاتو ته دوام ورکړي.
په ورته وخت کې نن وسلهوالو طالبانو هم د یوې خبرپاڼې په خپرولو سره د اختر په درېیوو ورځو کې د اوربند اعلان وکړ.
