افغانستان بوییچه ناتو تشکیلاتی نینگ ملکی نماینده‌سی نیکلاس کی، محمداشرف غنی و عبدالله عبدالله نینگ آره‌سیده بولگن تارتیشوونی جدی قیین‌چیلیک دییدی و بو ایکاویدن ایجابی بیر کیلیشووگه ایریشیش اوچون هیچ قنده‌ی سعی و حرکت دن وازکیچمس‌لرینی طلب قیلگن.
سلام‌وطندار بیلن خاص صحبت اوتکزگن جناب کی، سابق جمهور رئیس حامد کرزی، جمهورلیک ریاستی نینگ سابق اورین باسری یونس قانونی و عبدالرب‌الرسول سیاف دن حاضرگی وضعیت حل ایتیلیشی اوچون سعی و حرکت‌لریگه دوام بیریشلری و شونینگدیک، محمداشرف غنی و عبدالله عبدالله دن واسطه‌چی‌لرنینگ سعی و حرکت‌لریگه ایجابی جواب بیریش‌لرینی سوره‌گن.
اوشبو خاص صحبت ده جناب کی، افغانستان نینگ خوفسیزلیک کوچلری بیلن ناتو تشکیلاتی نینگ همکارلیگی دوام ایتیشی توغریسیده ایشانچ بیریب ایتیشیچه، بو تشکیلات افغانستان نینگ خوفسیزلیک کوچلری و بو مملکت نینگ تینچلیک جریانی گه یاردم بیریش خصوصیده، اراده‌لی دیر. اونینگ اورغولشیچه، طالبان اوروش میدانیده غالب بولمه‌یدی و تینچلیک‌که ایریشیش خصوصیده بولگن بیرینچی یول مذاکره دیر.
ناتو تشکیلاتی‌نی ملکی نماینده‌سی نینگ ایتیشیچه، تینچلیک سوزلشوولری گه یخشی نیت کورسه‌تیش اوچون، بو تشکیلات نینگ کوچلرینی رقمی 4 مینگ گه کمه‌یگنیدن سونگ، 12 مینگ گه ییتیشه‌دی. جناب کی نینگ ایتیشیچه، ناتو نینگ قراری شرط اساسیده بوله‌دی و بونده‌ی قرارلر وضعیت و تینچلیک سوزلشوولری آلغه آلیب باریلیشی اوچون آلینه‌دی.
نیکلاس کی نینگ کوپه‌یتیریشیچه، تینچلیک دن کیین هم ناتو افغانستان گه قیله‌دیگن همکارلیک‌لریگه دوام بیره‌دی. اونگه کوره، ناتو تشکیلاتی افغانستان نینگ تینچلیک جریانیده سرمایه یاتقیزگن و بو جریان نینگ کیلیشمه‌لرینی نظارت قیله‌دی.
نیکلاس کی کرونا ویروسی گه اشاره قیلیب ایتیشیچه، ناتو تشکیلاتی، خلق ارا یاردمچی‌لری و مالی حمایه‌چی‌لر کرونا ویروسی گه قرشی کوره‌ش خصوصیده، افغانستان حکومتی نینگ ایشلریدن حمایت قیلیشه‌دی، «اوشبو خلق ارالیک بیرلشمه کیله‌جک کونلرده برچه اوچون اونملی و حیاتی بولیشی ممکن.» بو تشکیلات افغانستان اهالیسی دن ساغلیک توصیه‌لریگه دقت قیلیش‌لرینی طلب قیله‌دی. «اویده قالینگ، اجتماعی فاصله‌نی رعایت قیلینگ و قوللرنی صابون بیلن تکرار یوویش» نی اونوتمنگ.
جناب نیکلاس کی نینگ ایتیشیچه، حاضرگی شرایط ده طالبان گروهی اهالی و امنیتی کوچلرگه قرشی هجوملری و اولدیریش‌لری گه نقطه قوییشی کیره‌ک. بونده‌ی قیلگنده، افغانستان اهالیسی کرونا ویروسی گه قرشی تینچلیک بیلن کوره‌‍شه‌دی.
اونینگ کوپه‌یتیریشیچه، افغانستان اهالیسی تینچلیک و ترقیات ایسته‌یدی و حاضر ایسه افغانستانده تینچلیک تأمین‌لنیشی اوچون اینگ یخشی فرصت دیر.
گزارشلر اساسیده، دنیاده کرونا ویروسی گه چلینگن‌لرنینگ رقمی بیر میلیون دن آشگن و کون اوتیشی بیلن کوپه‌ییب بارماقده. افغانستانده اوشبو ویروس گه چلینگن‌لرنینگ رقمی 484 کیشی گه ییتیشگن.
ناتو تشکیلاتی نینگ ملکی نماینده‌سی تینچلیک سوزلشوولری باشله‌نیشی‌نی ایسته‌گن بیرچاغده، طالبان گروهی نینگ بیرینچی کاروانی اوتگن کون بگرام قماقخانه‌سیدن قوییب یوباریلدی و شونینگدیک، کون یکونلنگونگه‌قدر اوشبو گروه نینگ باشقه 100 محبوسی قوییب یوباریلیشی گه قرار قیلینگن.
بوندن ایکی کون آلدین، طالبان گروهی محبوس‌لری نینگ قوییب یوباریلیشی تیکشیریلیشی اوچون 3 کیشی‌لیک تخنیکی بیر هیأت کابل گه یوبارگن ایدی و محبوس‌لرنی قوییب یوباریش آرتده قالدیریلگنی اوچون هیأتی‌نی دوحه گه چقیرگن. بیراق، بو قرار عمل‌گه آشیریلیشی‌دن آلدین، محمداشرف غنی طالبان نینگ محبوس‌لری قوییب یوباریلیشی گه بویروغ بیردی.
