په افغانستان کي د امریکايي ځواکونو عمومي قوماندان جنرال جان نیکلسن نن په کندهار کې د دولتي مسوولانو او قومي مشرانو سره په خبرو کې وویل چې طالبان سولې ته لېواله دي؛ خو د حتمي کېدو لهپاره پر هغوی پوځي او ډيپلوماټيک فشارونه زیاتوو.
هغه د هېواد د ملي امنیت د ریيس معصوم ستانکزي، کورنيو چارو وزیر ویساحمد برمک او د پنځو هېوادونو امریکا، کاناډا، هند، ډنمارک او اسټرالیا له سفيرانو سره یوځای کندهار ته تللی و او هلته یې په یوه خبري غونډه کې دا څرګندونې وکړې.
جان نیکلسن وویل، وسلهوالو طالبانو ته د حکومت هغه وړاندیزونه فرصت دی چې د سولې په برخه کې يې د هغوې د غوښتونو د منلو لهپاره کړي.
جنرال نیکلس زیاته کړه، له ډيپلوماتيکو فشارونو هدف دا دی چې «پر پاکستان حتمي کړو چې وسلهوال طالبان سولې ته چمتو کړي.»
په افغانستان کي د امریکايي ځواکونو عمومي قوماندان د کندهار د ديني عالمانو او اوسېدونکیو هغه غوښتنه ومنله چي د سولې هڅې باید له کندهاره ځکه پیل شي چې د طالبانو زیاتره لوړپوړي مسولان له همدې ولایته دي.
د کورنیو چارو وزیر ویساحمد برمک بیا پهخپلو خبرو کې د سولې روان بهیر مهم وبللو او زیاته يې کړه چې د ټاکنو لهپاره بشپړ چمتووالی لري او په هغو ولایتونو کې به د پولیسو تشکیل زیات کړي چې اړتیا یې لیدل کېږي.
د ملي امنیت عمومي رییس معصوم ستانکزی چې پهدې اړه له یاد پلاوي سره کندهار ته تللی؛ وویل چې افغانستان د دښمنانو د توطیو ښکار دی او د ټاکنو د ښو ټاکنو لهپاره باید افغانان پېژندپاڼې واخلي او پهدې ډول خپل ملي مسوولیت ادا کړي.
کندهار والې بیا په کندهار کې د پوهنې، اوبو او نورو ستونزو ترڅنګ یادونه وکړه چې ټاکنو ته بشپړ چمتووالی لري او د سولې د روان بهیر ګړندي کېدل د کندهاریانو یوازینۍ هیله ده.
ولسمشرمحمداشرف غني څه باندې یوه میاشت مخکې د کابل پروسې په دویم کنفرانس کې طالبانو ته د سولې بېقیده وړاندیز وکړ او دا یې هم ویلي وو، که راشي د یو سیاسي ګوند په توګه به یې قبول کړي.
