په تېرو ۱۳ کلونو کې د بلخ ولایت اوسېدونکي د مثبت اقتصادي پرمختګ شاهدان وو، خو د نوي حکومت د پېلېدو سره سم دغه چاره ټکنۍ شوې او خلک د اقتصادي پرمختګ څخه نه يواځې دا، چې شاته شوي بلکې د دوی پر اقتصادي وضعيت منفي اغیزې هم کړي دي.
د دغه ولایت سوداګران د ناامنيو او کاري فرصتونو د نشتوالي څخه سخت اندېښمن دي.
دوی وايي، که چېرې د افغان حکومت له لوري د امنيت راوستو په برخه کې جدي توجه ونه شي، نو د پخوا په څېر خپل تجارت ته دوام ور نه شي کړی.
دغه افغان سوداګران ټينګار کوي، چې د نوي حکومت له پېل راهیسې د دوی کاروبار په ټپه درېدلي دي.
محب الله يو سوداګر، چې د " افغان بازار" په نوم شرکت لري سلام وطندار ته وویل، اوسمهال په بلخ ولایت کې ټول کاروبار يې په ټپه درېدلي او پر خپلې پانګونې پېښمانه دی، ځکه د ده په وينا د خپلې پانګې د راتلونکي په باب تر سبا ورځې هم وړاندوينه نه شي کولی.
اخوا محمد نسيم د " نصیب سویابین" فابريکې عمومي مدير وايي، چې دولت باید د ماليې او د برق نرخ د ټيټوالي په برخه کې جدي پاملرنه وکړي.
د بلخ ولایت د سوداګرۍ خونو اجرايوي مدير نصیر احمد قاسمي اندېښنه څرګندوي، چې د پخوا په څېر په دغه ولایت کې د سوداګرۍ کچه ډېره ټيټه شوې.
هغه وايي، نوي حکومت ته ډېرې هيلې وې، چې ښايي د پخواني ولسمشر کرزي د وخت پرمهال ځينې پرتې ستونزې به هم لرې شي، خو په وينا يې برعکس ستونزې د پخوا په پرتله زياتې شوې.
قاسمي وايي: " همدا اوس په شمال کې د تجارت کچه ۶۰ سلنه کمه شوې" ؛ نوموړی يې عمده لاملونه په هېواد کې ناامني او د بهرنيو هېوادونو د مرستو په کمښت کې بولي.
قاسمي وايي، دغه وضعيت بهرني پانګوال نه شي هڅولي، چې په افغانستان کې پانګونه وکړي.
په بلخ ولایت کې د اقتصادي چارو کارپوه احمد ولي سنګر وايي، چې د سوداګرو له پاره تر ټولو اړينه مسله امنیت دی.
نوموړی خبرداری ورکوي، چې که امنيت په همدې شکل دوام وکړي، نو افغانستان به د لوی اقتصادي رکود سره مخ شي.
هغه وايي، همدا اوس افغانستان د ۸۰ سلنه اقتصادي رکود سره مواجه شوی.
یاده دې وي، چې له دې وړاندې د بلخ ولایت سرپرست والي عطامحمد نور هم په شمال کې د ناامنيو د زیاتوالي له امله خبرداری ورکړی وو او ويلي وو، که چېرې حکومت د امنیت راوستو په برخه کې جدي اقدام ونه کړي، نو دی به خلک را ټول کړي او د ناامنيو پر وړاندې به خپل غږ پورته کړي.
