ننگرهار والیسی سلیم قندوزی، مذکور ولایتده ملیشه توزه‌تیلیب کیلماقده دیگن ادعالرنی رد قیلیب ایتیشیچه، اولر هیچ بیر زمان ایسته میدیلر اهالی نینگ اوروشگه سهم آلیشی‌گه طرفدار بولسه‌لر؛ نیگه کی، امنیت تأمینله‌ش و ترورچیلرگه قرشی اوروشیش امنیتی کوچلر ایشی دیر.
ننگرهار والیسی نینگ ایتیشیچه، بو ولایتده امنیتی کوچلردن اهالی نینگ حمایت قیلیشی قانون چوکاتیده بولیشی ممکن. اونگه کوره، اهالی ترورچیلر قولیدن آلینیب پاک بولگن منطقه‌لرنی اسره‌ش اوچون امنیتی کوچلرگه یاردم بیره‌دیلر که بو ایشلرکوپلب محلی پولیس چوکاتیده عمل‌گه آشه‌دی.
جناب قندوزی نینگ ایتیشیچه، شو سونگی‌ده ترورچیلر تبلیغاتلری بیلن اهالینی قورقیتگن.
باشقه بیرتاماندن ننگرهار پولیس باشلیغی فضل‌احمد شیرزاد نینگ ایتیشیچه، ترورچیلرگه قرشی امنیتی کوچلر روحیه‌سی یوقاری کیتگن. شیرزادگه کوره، شو سونگی امنیتی کوچلر بیلن ترورچیلر ارا اوتکزیلگن اوروشلرده، 200 گه یقین ترورچی هلاک و 100 دن آشه‌سی هم تن جراحتی آلگن.
ننگرهار رسمی‌لری نینگ ایتیشیچه، تیزلیک‌ده شینوار و ولایت باشقه تومنلریده یوکسک عملیات اوتکزیلماقده.
ایتیلیشیچه، شینوار تومنیده طالب و داعش جنگریلری بیلن توقنه شوولر باشلنگنی‌دن بویان، کوپلب اوقووچیلر و اوقیتوچیلر عایله‌لری بیلن محلنی ترک قیلگنلر و کوپلب مکتب‌لر ایشیگی ایسه اوقووچیلر یوزیگه یاپیلگن.
شونینگ‌دیک گزارشلرگه کوره، داعش جنگریلری شو سونگی کونلرده کوپلب اوقیتوچی و اوقووچیلرنی ولایت ایریم تومنلریده تهدید قیلگنلر و شو اوچون هم مکتب‌لر ایشیگی اوقووچیلریوزیگه یاپیلگن.
بوندن آلدین ننگرهار والیسی شینوار تومنیده طالب و داعشگه قرشی اوروش اوتکزیلیشینی خوش قرشیله‌گن ایدی؛ اما محل یشاوچیلری والی نینگ سوزلرینی رد قیلیب ایتیشلریچه، داعش گروهی‌گه باغلیق جنگریلر شینوار تومنی یشاوچیلرینی طالب‌لر بیلن علاقه‌ده بولگن‌لیکگه عیب‌لب، اولرنی اولدیرگن ایکن.
