مدافعه وزیرلیگی‌نینگ رسمی‌لری، مملکت‌ده داعش و طالب‌لر صفیگه خارجی جنگری‌لر موجودلیگی‌دن خبر بیریب و ایتیشیچه، ننگرهارده داعش جنگری‌لریدن 70% و طالب‌لردن 30 الی 40 فایزی خارجی دیر.
اوتگن دوشنبه کون مدافعه وزیرلیگی سوزلاوچیسی دولت وزیری‌نینگ کابل‌ده اوتکزیلگن بیر خبری ییغینده ایتیشیچه، اوشبو خارجی جنگری‌لرنینگ کوپینچه‌سینی پنجابی، عرب، چچین، اوزبیک و تاجیک‌لر تشکیل بیره‌دی.
شونینگ‌دیک، جناب وزیری اوشبو ییغینده، اوتگن 48 ساعت جریانیده دولت‌گه قرشی قوراللی عصیانچیلردن 206 ته‌سی هلاک بولگنی‌دن خبر بیره‌دی. اونگه کوره، مذکور عصیانچی‌لر کنر، پکتیکا، میدان‌وردک، غزنی، زابل، هلمند، ارزگان و هرات ولایت‌لریده اوتکزیلگن 12 حربی عملیات نتیجه‌سیده هلاک بولگن. شونینگ‌دیک جناب وزیری، اوشبو عملیات‌لرده امنیتی کوچلردن 15 ته‌سی هلاک بولگنی‌دن خبر بیره‌دی.
اوشبو عملیات‌لر شونده‌ی حالده یولگه قوییله‌دی کیم، هلمند وضعیتی توغری‌سیده‌گی خواطرلر کونساین کوپیماقده. مذکور ولایت سنگین تومنی رسمی‌لری‌نینگ ایتیشیچه، اوشبو تومن طالب‌لر نظارتی‌گه اوتگن و یالغیز پولیس قومندانلیگی بناسی و حربی قرارگاه‌سی‌نی بیر قسمتی امنیتی کوچلر قورشاویده قالگن.
حکومت اجراییه باشلیغی عبدالله عبدالله، اوتگن (دوشنبه کون) مذکور ولایت وضعیتی توغری‌سیده امنیتی رسمی‌لر بیلن ییغین اوتکزیب و اولردن تیزلیک‌ده وضعیت‌نی عادی حالت‌گه قیتَریش‌لرینی سوره‌گن.
