ننگرهار ولایتی کینگش اعضاسی اجمل عمرنینگ ایتیشیچه، خوگیانی تومنیدهگی جلغوزه اورمانیده اویوشتیریلگن هوایی کوچلر هجومیده اوشبو اورمان نینگ 30 ایشلاوچیسی هلاک و باشقه 40 ایشلاوچیسی یرهلنگن. اونگه کوره، مذکور هجوم قربانیلری نینگ برچهسی تینچاهالی بولیب خوگیانی تومنی، پکتیا، خوست و کنر ولایتی یشاوچیلری دیر.
اونینگ ایتیشیچه، اوشبو جلغوزه اورمانی خوگیانی تومنی نینگ «وزیر» منطقهسیده قرار تاپگن و بوگون ایرتهلب ساعت 2 اطرافیده هوایی هجوم آستیده آلینگن.
مذکور جلغوزه اورمانی ایشلاوچیلری مسئولی حمید نینگ ایتیشیچه، اورماندهگی 150 ایشلاوچیدن یالغیز 8 تهسی تیریک قالگن.
اونینگ ایتیشیچه، دولت گه قرشی هیچ قندهی قوراللی گروه بیلن علاقهسی یوق ایکن.
ننگرهار حاکمی سوزلاوچیسی عطاالله خوگیانی اوشبو هجوم نی تصدیقلب بیراق ایتیشیچه، حادثه تلفاتی توغریسیده حاضرگچه بیللی تفصیلات قولگه کیلمهگن.
ننگرهار پولیسی سوزلاوچیسی مبارز اتل نینگ ایتیشیچه، مذکور حادثهده 15 تینچاهالی هلاک و باشقه 6 تینچاهالی یرهلنگن.
ایتیش کیرهک کیم، خوگیانی تومنی نینگ کوپینچه تاغلی و اورمانلی بولیملری داعش گروهی نظارت گه قرار تاپگن و دولتی و چیتایللیک کوچلر ایریم پیتلر ییر و هوا آرقلی هجوم یولگه قوییب داعش جنگریلری هلاک ایتیلگنیدن خبر بیرهدیلر.
شو توغریده:
