طالبان گروهی سونگی پیتلرده پلخمری شهرینینگ اطرافیده هجوملرینی کوپهیتیرگن و اوشبو موضوع بغلان ولایتی کینگش اعضالری و مدنی فعاللرینی خواطرلنتیرگن.
بغلان ولایتی کینگش اعضاسی بسمالله عطاش نینگ ایتیشیچه، طالبلرنینگ هجوملری کوپهیشی باعث، پلخمری شهری اوشبو گروه جنگریلرینینگ قمراویگه قرار تاپگن و اولر ایستهگن چاغده بو شهرگه هجوم قیلهآلهدی. اونینگ ایتیشیچه، پلخمری شهرینینگ اطرافینی طالبلر وجودیدن تازهلش اوچون امنیتی ادارهلرنی سعی و حرکت قیلیشی کیرهک.
بغلان مدنی فعاللریدن بیری محمدعثمان شیرزینینگ ایتیشیچه، طالبلرنینگ هجوملری کوپهیشی بیلن، اوشبو ولایت محلی و حربی مسووللری اوروش مدیریتینی قولدن بیرگن و تیزلیککه حکومتنینگ بو توغریده دقت قیلیشی کیرهک.
عینحالده، بغلان حاکمی عبدالحی نعمتینینگ بو ادعالرنی تصدیقلب ایتیشیچه، تیزلیککه پلخمری شهرینینگ اطرافینی طالبلر وجودیدن تازهلش اوچون حربی عملیات یولگه قوییلهدی.
بغلان ولایتی کینگش اعضالری و مدنی فعاللرینینگ ایتیشیچه، طالبان گروهی بیر آیدن بویان اوشبو ولایت تورلی منطقهلریده هجوملرینی کوپهیتیرگن، بیراق امنیتی کوچلر دفاعی حالتده قرار تاپیب و هر کون قربانلیک بیرهدیلر.
