اخیرگی وقتلرده ننگرهار ولایتیده اوتکزیلگن حربی تازه‌لش عملیات نتیجه‌سیده داعش جنگریلری نابود ایتیلگن ایدی. لیکن، بو جنگریلر ینه ولایت نینگ بعضی تومنلریگه قیتگن لیگی توغریسیده گزارشلر بار.
ایتیلیشیچه، ولایت نینگ بعضی تومنلری جمله‌دن پچیراگام ولسواللیگیده مردمی کوچ بیلن داعش توده‌سی اورته‌سیده آغیر اوروش جریانی بار.
پچیر یشاووچیلری، داعش جنگریلری اونلب انساننی بو تومنده اولدیرگن دیدیلر. شونینگدیک اونلب خاتین و بلاغتگه ییتمه‌گن گودکلر جنگریلر تامانیدن آلیب کیتیلگن لیگی ایتیله‌دی. داعش جنگریلر تینچ اهالی نینگ یشش اوی جایینی اوتگه بیرگن لیکلری محل اهالیسی تامانیدن تیلگه آلیندی.
داعش توده‌سیگه اعضالیککه کیرگنلرنینگ کته قسمی اورکزی قبیله‌سیدن بولگن لیگی تیلگه آلینه‌دی. بو قبیله دیورند نریاغیدن حمایت بولیشلری تاکیدلنه‌دی. شونینگدیک منطقه‌نینگ اهالیسی جان و ماللری سقله‌نیشی اوچون حکومتدن بو توغریده تفاوت سیز قالمس لیگینی سوره‌گنلر. مساله اوچون حکومت اعتبار قره‌تمه‌گن حالده، پچیراگام عادی خلق گورستانی‌گه ایله‌نیشی ممکن لیگی تیلگه آلینه‌دی.
اوروش چیزیغی‌ده بولگن پچیراگام تومنی نینگ ولسوالی میربازخان ممتاز سونگی کونلرده یوز بیرگن اوروش نتیجه‌سیده پچیراگام بالا و پایین‌دن مینگلب خانه‌دان آواره بولگنلر دیگن. اونگه کوره، محل‌ده فقط مردمی کوچ قالگن.
پچیراگام تومنیده دوام ایته دیگن اوروش نینگ تلفاتی حقیده انیق معلومات بیرمه‌گن میرباز خان ممتاز، محل اهالیسی‌گه اساسلب، اوروشده مردمی کوچدن 70 کیشی هلاک بولیب و 40 سی ایسه یره لنگن دیگن.
عین حالده، ننگرهار ولایتی والیسی نینگ سوزلاوچیسی عطاالله خوگیانی، امنیتی قوشمه حربیلر اوتگن کیچه پچیراگام تومنی‌گه ییتیب بارگنلر دیگن. اونگه کوره، تومن قیته‌دن جنگریلر اشغالیدن آزاد ایتیلیشی اوچون حربی عملیات اوتکزیله‌دی دیگن.
افغانستان ایچکی ایشلر وزیری تاج‌محمد جاهد، کونیکیچه ننگرهار ولایتی نینگ ینگی والیسی‌نی تانیشتیریش مراسمی‌ده قیلگن چیقیش‌ده پچیراگام تومنیده‌گی اوروش توغریسیده اشاره قیلیب، بو تومنده ینگی حربیلر یوباریلیشی اوچون جمهور رییس بویروغ بیرگن دیگن. اونگه کوره، پچیراگام تومنی تیزلکیده جنگرلردن تازه لنه‌دی.
