لوگر ولایتی محمدآغه تومنی نینگ یشاوچیلری و مسؤوللرینینگ ایتیشیچه، اوتکن کون کیچ قورون بیر 20 یاشر حربی عسکر و رفیقهسی زهر ییب حیاتلریگه نقطه قویگنلر. محمدآغه تومن یشاوچیسی مصطفینینگ سلاموطندارگه ایتیشیچه، بدنگی نامی بیلن تنیلگن روحالله و رفیقهسی، اوغیل باله عایلهسینینگ ساوچیلیگی قیز عایلهسی تامانیدن رد ایتیلگنیدن کیین، خودکش لیککه قول اورگنلر.
ایتیلیشیچه، اوشبو اوغیل و قیز تورت ییلدن بویان بیری – بیراونینگ یخشی کورر ایکن و زهرلی دارو ییب حیاتلریگه نقطه قویگن.
بیراق، محمدآغه یشاوچیلریدن باشقه بیری سید داوودنینگ سلاموطندارگه ایتیشیچه، اوشبو حربی عسکر عایلهسینی نیچه مرته آگاه لنتیریب، اونینگ قیز بیلن اویلنتیرمهگن صورتده، خودکش لیککه قول اوریشینی ایتکن.
محل یشاوچیلریگه کوره، روحالله قیزنینگ عایلهسی تامانیدن رد جواب ایشیتکنیدن کیین، زهرلی دارو ییب خودکشلیک قیلگن و قیز ایسه بو ییگیت اولیمینی ایشیتکندن کیین، تیزاب ایچیب کسلخانهگه ییتیشگنیدن سونگ جان بیرگن.
روحاللهنینگ جنازهسی اوتکن کون کیچ قورون و قیزنینگ جنازهسی بوگون پنجشنبه ساعت 9 ده توپراققه قوییلگن.
لوگر عیاللر ریاستی باشلیغی شیما زرگر، محمدآغه تومنیده بو واقعه یوزبیرگنینی تصدیق لب ایتیشیچه، واقعه توغریسیده بولگن معلوماتنی تیکشیرولردن کیین میدیا بیلن شریک قیلهدی.
باشقه تاماندن، محمدآغه تومنی پولیس قوماندانی مطیعالله صادق، واقعهنی تائیدقیلیب ایتیشیچه، بو ایکی واقعه کیینمه کیین یوزبیرگن.
جناب صادقنینگ کوپهیتیریشیچه، پولیس رسمیلری دستلبکی تیکشیرویگه کوره، ایسلنگن اوغیل و قیز بیری- بیراوینینگ یخشی کورر ایکن و عایلهلری اویلهنیشلریگه راضی بولمهگنی باعث، بو ایکاوی خودکش لیککه قول اورگن دیگن.
اونگه کوره، پولیس رسمیلری بو بارهده تیرگاوونی دوام ایتیرماقده.
مملکت یاشلریگه یالغیز لوگر واقعهسی خودکشلیک ایمس دیر. قبیلهیی سنتلر، زورهوانلیک بیلن تورموش قوریش، ناقولی رسم و رواجلر، اقتصادی کمبغللیک و عایلهوی قیینچیلیکلر مملکت بویلب یاشلرنی خودکش لیککه ترغیب ایتهدی.
اوز ایستهگی بیلن تورموش قوریش، یاشلر اینیقسه قیزلر اوچون کته بیر قیینچیلیک دیر. عایلهلر اوغیل و قیزلرینینگ علاقهسیدن آگاه بولگن چاغده، اولرنینگ بیری – بیراوی بیلن تورموش قوریش لریگه توسیق بولهدی.
شونینگدیک، ایریم پیتلرده، مذهبی و نژادی فرقلر، یاشلرنینگ تورموشلریگه توسیق بولیب، ایکی تامان اورتهسیده دشمنلیککه سبب بولهدی.
