د ننګرهار امنیتي چارواکی وايي، چې د افغانستان او پاکستان له پاره د داعش ډلې مشر حافظ سعید په دغه ولایت کې وژل شوی دی.
ختیځ کې د ۲۰۱ سېلاب قول اردو قوماندان جنرال محمد زمان وزیري تېره ورځ اچین ولسوالۍ کې خبریالانو ته د نوموړي د وژل کېدو پخلی وکړ او زیاته یې کړه، چې د داعش ډلې دغه مشر د تېرو دوو اونیو د عملیاتو په لړ کې وژل شوی دی.
نوموړي زیاته کړه، چې نوموړی د اچین ولسوالۍ په اړوندو سیمو کې له خپلو ۲۳ نورو قوماندانانو سره یو ځای وژل شوی دی.
وزیري همدا راز وویل، چې د دغو عملیاتو په ترڅ کې یې سلګونو داعش جنګیالیو ته مرګ، ژوبله اړولې او همدا راز کوټ ولسوالي یې د داعش ډلې له موجودیته پاکه کړې ده.
قهر سېلاب عملیات څه دپاسه دوه اونۍ مخکې د ولسمشر محمد اشرف غني په امر د ننګرهار په کوټ، اچین، نازیان، هسکې مېنې او ورڅېرمه سیمو کې پیل شوي، چې تر دې دمه په کې کوټ ولسوالي د داعش ډلې له موجودیته پاکه شوې ده.
شاوخوا وړمه اونۍ په کوټ کې د داعش ډلې د جګړې قوماندان سعد امارتي هم د کومانډويي ځواکونو په عملیاتو کې وژل شوی و.
داعش ډلې تر اوسه په دې اړه څه نه دي ویلي.
