نماینده‌لر کینگشی جنجلی، نماینده‌لر کینگشی نینگ باشلیغی تعیین ایتیلیشی خصوصیده یولگه قوییلگن سیلاونی ایکینچی دوریده آوازلر سنلگنیدن سونگ اوج آلدی. نماینده‌لر کینگشی نینگ وقتینچه‌لیک باشلیغی عطامحمد دهقانپور، آواز بیریش جریانی باشله‌نیشیدن آلدین کینگش نصابی‌نی 247 کیشی اعلان قیلدی و بو رقم صندوقلردن چیققن آوازلرگه ماس کیلمه‌دی.
اعلان ایتیلگن رقم اساسیده، نماینده‌لر کینگشی ریاستی سیلاویده غلبه قازانگن نامزد، 50+1 نی تولدیریش اوچون (124) آواز قولگه کیریتیشی کیره‌ک ایدی.
صندوقلردن چیققن آوازلر ایلگری محاسبه‌نی بوتونله‌ی برهم اوردی. صندوقلردن چیققن آوازلر آق و باطل آوازلر بیلن بیرگه 244 آوازگه ییتیشدی. کمال‌ناصر اصولی و میررحمان رحمانی آره‌سیده بولگن رقابت‌ده جناب رحمانی 123 آواز قولگه کیریتدی.
نماینده‌لر کینگشی‌ده جناب رحمانی نینگ طرفدارلری، بیرآز مشاجره دن سونگ، رحمانی نینگ یوتوقی اوچون وقتینچه‌لیک باشلیغ امضاءسینی آلیش گه مؤفق بولگن‌لر.
میررحمان رحمانی نینگ طرفدارلرینی استدلالی گه کوره، صندوقلردن چیققن آوازلر اساسیده، رحمانی آوازلرنی یریمی‌دن کوپینی قولگه کیریتگن و سیلاوده غلبه قازانگن. بیراق، کمال‌ناصر اصولی تامانی و نماینده‌لردن باشقه بیرقطاری، بو استدلال گه قرشیلیک کورستگن‌لر. اولر، بو ایکاویدن باشقه نامزدلر آره‌سیده نماینده‌لر کینگشی ریاستی اوچون قیته‌دن سیلاو یولگه قوییلیشی‌نی ایسته‌گن‌لر.
عین حالده، حقوقی و قانون نقطه‌ی نظردن حق کیم گه، اصولی یا-ده رحمانی؟
نماینده‌لر کینگشی نینگ ایچکی قاعده‌سی و وظیفه‌لرینی 71- ماده‌سیده بونده‌ی دییلگن: «اساسی قانون حکمی اساسیده، بیر موضوع حاضر بولگن اکثریت بیلن تصدیقلنه‌دی و اکثریت ایسه فایده‌لنیلگن آواز بیریش ورقلر یوزیدن اثباتلنه‌دی.»
سلام‌وطندارگه صحبت بیرگن افغانستان بوییچه حقوقدانلر بیرلیگی رهبرلیک کینگشی اعضاسی وحید فرزه‌یی نینگ ایتیشیچه، ایسلنگن ماده اساسیده، جناب رحمانی نماینده‌لر کینگشی ریاستی اوچون اوتکزیلگن سیلاوده غلبه قازانگن.
جناب فرزه‌یی گه کوره، هر بیر نماینده آواز بیریش ورقنی آلیب و هر بیر دلیل اساسیده، اوندن فایده‌لنمه‌گن صورتده، آوازی حسابگه آلینمه‌یدی.
حقوقدانلر بیرلیگی‌نی اوشبو اعضاسی نینگ ایتیشیچه، نماینده‌لر کینگشی نینگ ایچکی قاعده‌سی و مسؤولیت‌لریدن نماینده‌لرنینگ خبرسیزلیگی باعث، نماینده‌لر کینگشی جنجلی شدتلنگن.
شونینگدیک، بیلیم یورت استادی محمداکرم عارفی نینگ ایشانچی گه کوره، نماینده‌لر کینگشی نینگ ینگی نماینده‌لری ایچکی قاعده و مسؤولیت‌لردن خبرسیزلیگی باعث، جنجل چیققن.
بیراق، مملکت حقوقدانلریدن باشقه بیری عبدالکبیر رنجبرنینگ ایتیشیچه، اساسی قانون نینگ 106- ماده‌سی اساسیده، نماینده‌لر کینگشی نینگ ایچکی آواز بیریش جریانیده صندوقده‌گی آوازلر رقمی ایمس، بلکیم حاضر بولگن نماینده‌لرنینگ رقمی اونملی بوله‌دی و شو یوزه‌دن نماینده‌لر کینگشی ریاستی نینگ نامزدلریدن هیچ بیری کوپینچه آوازنی قولگه کیریته آلمه‌گن.
جناب رنجبرگه کوره، رحمانی نماینده‌لر کینگشی ریاستی نینگ چوکیسی‌ده اولتیرگن صورتده، مقامی قانونی نقطه‌ی نظردن نامشروع دیر.
عین حالده، نماینده‌لر کینگشی جنجلی حاضر هم اوز جاییده قالگن. نماینده‌لرنی آره‌سیده بولگن حاضرگی جنجل حل ایتیلیشی اوچون 27 کیشی‌لیک هیأت تشکیل ایتیلگن.
