نماینده‌لر کینگشی‌دن میدیالرگه چیققن مکتوب‌نی کورسه‌تیشیچه، نماینده‌لر کینگشی‌نینگ مصؤونیت، امتیاز و حقوقی کمیسیونی، مالی و بودجه ایشلری بوییچه کمیسیونیدن نماینده‌لردن بیرقطاری‌نینگ امتیازلری ایکی برابر بولیشی و شونینگ‌دیک، اولر اوچون بیر شهرچه قوریلیشی طلب قیلینگن.
اوشبو مکتوب نماینده‌لر کینگشی اعضالریدن بیرقطاری، مدنی اداره‌لر و یشاوچیلرنینگ جدی عکس‌العملی‌گه روپه‌ره بولدی.
مذکور مکتوب اساسیده، نماینده‌لر کینگشی‌نینگ اعضالری، امتیازلری 45 مینگ‌دن 90 مینگ افغانی گه، کریدت کارت‌لری 5 مینگ‌دن 10 مینگ افغانی گه، موترلری‌نینگ یانغین ماده‌سی خرجتی 10 مینگ‌دن 20 مینگ افغانی گه و اوی کراسی 25 مینگ‌دن 50 مینگ افغانی گه کوپه‌یتیریلیشی سوره‌لگن.
افغانستان شفافیتی‌نی تیکشیرووچی اداره باشلیغی سیراکرام افضلی‌نینگ سلام‌وطندارگه ایتیشیچه، نماینده‌لر کینگشی تامانیدن 1397- مالی ییل بودجه‌سی رد ایتیلیشی‌ده، نماینده‌لر کینگشی‌نینگ اعضالری، بودجه‌نی حکومت اوستیگه باسقین وسیله توزه‌تگن. جناب افضلی گه کوره، سونگی کونلرده مالیه وزیرلیگی نماینده‌لر کینگشی اعضالری‌نینگ ایستک‌لریگه تَن بیرگن و اولرنینگ پروژه‌لرینی بودجه گه شامل قیلگن.
سلام‌وطندارگه صحبت بیرگن نماینده‌لر کینگشی‌نینگ مصؤونیت کمیسیونی اعضاسی رمضان بشردوست‌نینگ ایتیشیچه، 1397- مالی ییل بودجه‌سی نماینده‌لردن بیرقطاری‌نینگ امتیاز طلب‌لیگی سبب رد ایتیلگن. اونینگ ایتیشیچه، نماینده‌لر کینگشی بودجه‌نی گروگه آلگن.
بشردوست گه کوره، حکومت هردایم مجلس اعضالری‌نینگ ایستک‌لریگه تَن بیرگن و بو مرته هم اولرنینگ ایستک‌لرینی عمل‌گه آشیرگن. اونینگ ایتیشیچه، نماینده‌لر کینگشی‌نینگ اعضالری، شخصی امتیازلری اوچون مملکت یشاوچیلرینی ایسلریدن چیقارگن و برچه نرسه اوچون امتیاز ایسته‌یدیلر.
بیراق، مالیه وزیرلیگی سوزلاوچیسی اجمل حمید عبدالرحیمزی‌نینگ سلام‌وطندارگه ایتیشیچه، نماینده‌لر کینگشی‌نینگ مصؤونیت کمیسیونی تامانیدن هیچ بیر مکتوب قولگه کیریتمه‌گن‌لر. اونینگ ایتیشیچه، بودجه امکانیت اساسیده، اجره‌تیله‌دی و برچه فعالیت‌لرینی قانون اساسیده، عمل‌گه آشیره‌دیلر.
یوقاریده ایسله‌نیب اوتیلگن نرسه‌لردن باشقه اوشبو مکتوب‌ده نماینده‌لر کینگشی‌ده ایش قیله‌دیگن ملازملر، هیداوچیلر و نماینده‌لرنینگ قوروقچی‌لرینی امتیازلری کوپه‌یتیریلیشی طلب قیلینگن.
