نماینده‌لر کینگشی اعضالریدن بیرقطاری، حکومت‌دن اعتراضچی‌لرنینگ خیمه‌لرینی کوتریشینی سوره‌گن‌لر.
بوگون «چهارشنبه» نماینده‌لر کینگشی‌نینگ عمومی ییغینیده نماینده‌لردن بیرقطاری‌نینگ ایتیشیچه، کابل شهریده اعتراضچی‌لرنینگ خیمه‌لری یوللر توسیلیشی و شهر یشاوچیلرینی جدی قیین‌چیلیک‌که روپه‌ره قیلگن و بو خیمه‌لر حکومت تامانیدن کوتریلیشی لازم.
عین حالده، نماینده‌لر کینگشی اعضالریدن باشقه بیرقطاری‌نینگ ایتیشیچه، حکومت اوشبو خیمه‌لرنی کوترمه‌گن صورتده، اولر خیمه‌لرینی اهالی‌گه قیین‌چیلیک یره‌تمه‌یدیگن ییرلرگه آلیب باریب قوریشلری کیره‌ک.
نماینده‌لر کینگشی اعضاسی منورشاه بهادری‌نینگ ایتیشیچه، خیمه قورگن اعتراضچی‌لر بیر تاماندن مدنی حقوقلری اوچون دادخواه‌لیک قیله‌دیلر و باشقه بیر تاماندن باشقه‌لرنینگ حقوقی‌نی نقض قیله‌دیلر.
نماینده‌لر کینگشی اعضالریدن باشقه بیری صالح‌محمد صالح‌نینگ ایتیشیچه، کیم‌سه دادخواه‌لیک آتی‌دن فایده‌لنیب اهالی‌نینگ یولی‌نی توسیب و اولرگه خلقت ییتکزیش‌گه حق‌دار ایمس دیر.
بیراق، نماینده‌لر کینگشی اعضالریدن باشقه بیری داکتر ظهیر سعادت‌نینگ ایتیشیچه، ناراضیلیک نمایش و خیمه قوریش یشاوچیلرنینگ حقی دیر و ظرفیت‌سیز مسؤوللرنی چیکلنتیریش اوچون اعتراض بیلدیریش‌گه حق‌دارلر.
عین حالده، نماینده‌لر کینگشی اعضالریدن بیرقطاری، کینگش باشلیغی عبدالرووف ابراهیمی‌نینگ ریاستی‌ده هر ولایت‌دن بیر نماینده اعضالیگی‌ده بیر کمیسیون تشکیل ایتیلیب، اعتراضچی‌لرنینگ ایستک‌لریگه تیکلب و بو قیین‌چیلیک‌نی حل ایتیش اوچون حکومت و اعتراضچی‌لرنینگ آره‌سیده میانجی بولیشی‌نی تکلیف قیلگن‌لر.
نماینده‌لر کینگشی‌نینگ باشلیغی عبدالرووف ابراهیمی، مجلس اعضالری‌نینگ بو تکلیفی‌نی قبول قیلیب و مجلس اعضالریدن هر ولایت نماینده‌لرینی بو کمیسیون‌گه تانیشتیریشی‌نی سوره‌گن.
سونگی نیچه کونده، نه فقط اعتراضچی‌لر بلکیم خوفسیزلیک کوچلر، امنیتی تهدیدلرنینگ آلدینی آلیش اوچون ارگ‌گه باره‌دیگن یوللرنی کانتینر و حربی نقلیه واسطه‌لر بیلن توسگن و بو مسئله کابل یشاوچیلرینی کوپینچه قیین‌چیلیک‌که روپه‌ره قیلگن.
