افغانستان سیاسی گروهلری و حزبلرینینگ دواملی باسقینلری نتیجهسیده سیلاولر ایرکین کمیسیونی، نمایندهلر کینگشینینگ سیلاویده «بایومتریک» سیستمهسیدن فایدهلنیشینی بیلدیردی و بو موضوع دن سونگ، بایومتریک سیستمهسیدن آنلاین یا-ده آفلاین شکلده فایدهلنیشی سیاسی ییغینلرده قیزیق بحث گه اوزگردی. ینگیلیکده سیاسی حزبلر سیلاولر ایرکین کمیسیونیدن «بایومتریک» دن (Automated Fingerprint Identification Systems (AFIS) ) آنلاین شکلده فایدهلنیشینی طلب قیلگن.
بیراق، سلاموطندارگه صحبت بیرگن سیلاولر ایرکین کمیسیونی سوزلاوچیسی حفیظالله هاشمینینگ ایتیشیچه، بایومتریکدن فایدهلنیش ایش طریقهسی تیارلنگن و بایومتریک اسکونهسیدن آفلاین شکلده فایدهلنیشی توغریسیده قرار قیلینگن. جناب هاشمینینگ ایتیشیچه، افغانستاننینگ بوتون جغرافیاسی انترنت و مخابرات آرقهلی قاپلنمهگنی باعث، بایومتریکدن آنلاین شکلده فایدهلنیب بولمهیدی.
بوندن آلدین، سلاموطندارگه صحبت بیرگن مخابرات وزیرلیگی، مملکت جغرافیاسیدن 89% مخابرات آرقهلی قاپلنگنینی بیلدیرگن ایدی.
نمایندهلر کینگشی سیلاویده بایومتریک اسکونهسیدن آنلاین شکلده فایدهلنیلگن صورتده، آواز بیرگن کیشینینگ معلوماتی تیزلیککه تیکشیریلیب و سیلاو کونیده باشقه اسکونهلرده تانیلهدی. بیراق، حاضر بایومتریک اسکونهسیدن آفلاین شکلده فایدهلنیشی توغریسیده قرار قیلینگن. بوندهی بولگن صورتده، آواز بیرووچینینگ معلوماتی آواز بیرگن کونیدن بیر کون کیین سرورگه انتقال بیریلیب و او ییرده تیکشیریلیشی ممکن.
سلاموطندارگه صحبت بیرگن فیفا اجراییه باشلیغی یوسف رشیدنینگ ایتیشیچه، سیلاولر ایرکین کمیسیونی بایومتریک اسکونهسیدن فایدهلنیش طریقهسینی تیزلیککه ترقهتیشی کیرهک. جناب رشیدگه کوره، بایومتریکدن فایدهلنیش طریقهسی ترقهتیلگن صورتده، بایومتریک اسکونهسیدن قندهی بیر شکلده فایدهلنیش و نمایندهلر کینگشینینگ سیلاوی قندهی بیر شکلده یولگه قوییلیش سوراقلریگه جواب بیرهدی.
عین حالده، سیلاولر ایرکین کمیسیونی سوزلاوچیسی حفیظالله هاشمینینگ ایتیشیچه، ایش طریقهسینی سیلاولر ایرکین کمیسیونی تیارلگن و کمیسیون اعضالری تامانیدن تصدیقلنگنیدن سونگ، مذکور کمیسیوننینگ وبسایتیده ترقهتیلیشی خصوصیده قرار قیلینگن.
