د ډېسمبر ۳ د معلولیت لرونکو کسانو د نړیوالې ورځې سره برابر ده. په ۱۹۹۲ کال کې دا ورځ د ملګرو ملتونو له خوا د معلولیت لرونکو کسانو د نړیوالې ورځو په نوم اعلان شوه.
په افغانستان کې له دغې ورځې په داسې حال کې نمانځنه کېږي، چې د کار، ټولنیزو، شهیدانو او معلولینو وزارت د رسمي شمېرو له مخې په هېواد کې۱۱۰ زره معلولیت لرونکي کسان ثبت شوي دي.
د کار او ټولنیزو چارو وزیرې نسرین اوریاخېل وویل، له ۱۷ پرمختیايي موخو ۷ هغه یې د معلولینو د وضعیت څېړلو او د هغوی ستونزو ته رسېدنه ده، چې په دې برخه کې د بنسټیزو پرمختیایي موخو عملي کولو له پاره یې کمېټه ګومارلې او لومړنۍ چارې پیل کړي دي.
مېرمن اوریاخېل د اندېښنې په څرګندولو سره وویل، هغه قوانین، چې په تېرو کلونو کې د معلولیت لرونکو کسانو له پاره جوړ شوي وو؛ په سمه توګه نه دي عملي شوي او د کاغذ پر مخ پاتې دي.
د کار او ټولنیزو چارو وزارت مسوولین وایي، د حکومت د نوې طرحې پر بنسټ ټول دولتي بنسټونه مکلف دي، چې په خپلو ادارو کې ۷ سلنه معلولیت لرونکي کسان جذب کړي.
په غونډه کې اجرایوي رییس عبدالله وویل، پایداره انکشافي موخې تېر کال د ملګرو ملتونو سازمان له خوا تصویب شوي، چې په عملي کېدو سره یې په هېواد کې د معلولیت لرونکو کسانو وضعیت ته جدي پاملرنه کېږي.
عبدلله وویل، ټول حکومتي بنسټونه او اړوند وزارتونه هڅه کوي، چې د معلولیت لرونکو کسانو وضعیت کې مثبت بدلون راوستل شي او ډاډ یې ورکړ، چې حکومت په جدي توګه د معلولیت لرونکو کسانو ستونزو ته رسېدنه کوي.
