ناپېژاندو کسانو په فاریاب کې یوه زده کړیاله وژلې ده

د فاریاب ولایت امنیتي مسوولان په دغه ولایت کې د ناپېژاندو کسانو له خوا د یوې زده کړيالې د وژل کېدلو خبر ورکوي. د دوی پر وینا، ۲۲ کلنه عاطفه چې پوهنتون ته د خپل مونوګراف د دفاع له پاره تللې وه؛ له پوهنتونه د راګرځېدلو پر وخت د ناپېژاندو کسانو له خوا په مرموز ډول قتل شوې ده.

د دې ولایت د پشتونکوټ ولسوالۍ امنیه قومندان سخیداد عثماني سلام وطندار ته وویل، چې د دغې محصلې جسد د دې ولسوالۍ په آق مسجد سیمه کې پيدا شوی دی. عثماني وايي، تر اوسه د دې پېښې علت او انګېزه نه ده معلومه، خو جسد روغتون ته لېږدول شوی او په دې اړه پلټنې روانې دي.

د عاطفې مېړه، محمد هاشم وايي، سهار یې په خپله هغه پوهنتون ته رسولې ده او ښځې یې له هیچا سره داسې غیرعادي رفتار نه دی کړی، چې له هغې دې د وېرې احساس وشي.

د فاریاب ولایت د بشري حقونو کمېسیون سیمه ییز رییس حفظ الله فطرت په دې اړه وویل، چې دوی په تېره یوه اونۍ کې د ځانوژنې او د ښخو د وژلو ۷ پېښې ثبت کړې دي.

د فطرت پر وینا، د دې پېښو اصلي انګېزه نه دی معلومه، خو هغوی چې ځانونه یې وژلي؛ له دواګانو نه یې ګټه اخیستې ده.